АҚШ: Marinera танкери Венесуэла ва Эрондан нефт ташиган

7 январ куни Шимолий Атлантикада ушланган ва АҚШ федерал суди томонидан Америка санкцияларини бузгани учун берилган ордер асосида қўлга олинган Marinera (Bella1) танкери эҳтимол, РФнинг “соя флот”ига мансуб ҳамда Венесуэла ва Эрон нефтини ташиган. Бу ҳақда АҚШ бош прокурори Пэм Бондининг 7 январ, чоршанба куни кечқурун X ижтимоий тармоғида эълон қилинган баёнотида айтилади.

“Ушланишдан қутулиш учун, жумладан АҚШ соҳил қўриқлаш хизмати (Coast Guard)дан қочишга уринишларга қарамай, BELLA 1 кемаси бугун эрталаб ушланди”, — дейилади унинг X’даги постида. Бонди қайд этишича, ушбу кема экипажи аъзоларига нисбатан соҳил қўриқлаш хизматининг буйруқларини бажармаслик ҳолати бўйича кенг қамровли тергов олиб борилмоқда, айбдор деб топилганларга жиноий айбловлар қўйилади.

Шунингдек, АҚШ Адлия вазирлиги шундай мажбурий чоралар қўлланиши мумкинлиги нуқтаи назаридан яна бир неча кемани кузатаётгани айтилган. “Соҳил қўриқлаш хизмати ёки бошқа федерал мансабдор шахсларнинг кўрсатмаларини бажармаган ҳар қандай шахсга — у қайси кемада бўлишидан қатъи назар — тергов бошланади ва у қонунга тўлиқ мувофиқ тарзда жавобгарликка тортилади”, — дея огоҳлантирди АҚШ бош прокурори.

Bella 1 танкери аввал Панама байроғи остида юрган ва АҚШ блокадасига қарамай, Венесуэла соҳилларига яқинлашишга уринган. Декабр ойида АҚШ соҳил қўриқлаш хизмати уни ушламоқчи бўлган, аммо Россия, Украина ва Ҳиндистон фуқароларидан иборат экипаж талабларга бўйсунмаган ва йўналишни кескин ўзгартирган. Экипаж кема бортига РФ байроғини чизган ва номини Marinera деб ўзгартирган.

Танкерни ушлаш операцияси АҚШ Адлия, Ички хавфсизлик ва Мудофаа вазирликлари кўмагида ўтказилган — бунга кемани АҚШ соҳил қўриқлаш хизмати кемаси излаб топганидан сўнг киришилган. ОАВ маълумотларига кўра, операцияда десант иштирок этган. Десант танкерга Россия ҳарбий кемалари ва сувости кемаси етиб келишидан олдин чиқарилган — улар бироз олдин Marinera томон йўл олган эди.

РФ Транспорт вазирлиги АҚШ ҳаракатларини денгиз ҳуқуқи бузилиши деб атади. “1982 йилги БМТнинг Денгиз ҳуқуқи бўйича конвенцияси нормаларига мувофиқ, очиқ денгизда эркин сузиш режими амал қилади ва ҳеч бир давлат бошқа давлатлар юрисдикциясида тўғри тарзда рўйхатдан ўтказилган кемаларга нисбатан куч ишлатиш ҳуқуқига эга эмас”, — дейилади Москвадаги баёнотда. Шу маълумотларга кўра, АҚШ ҳарбий-денгиз кучлари кемага “десант туширганидан” кейин кема билан алоқа узилган.