Қўшимча функционаллар
-
Тунги кўриниш
Россия танкери Ўрта Ер денгизида бошқарувни йўқотди
ЕИ санкцияси остидаги, 730 минг баррель нефт юкланган Россиянинг “Прогресс” танкери Жазоир соҳиллари яқинида йўналишдан чиқиб кетди. Бир кун олдин Франция ўхшаш йўналишда кетаётган GRINCH танкерини Ўрта Ер денгизида тўхтатган эди.
Фото: Damien Meyer/AFP
Евроиттифоқ ва Буюк Британия санкциялари остида бўлган, Россия нефтини ташигани учун чеклов қўйилган “Прогресс” танкери Жазоир соҳиллари яқинида курсдан чиқиб, Ўрта Ер денгизида бошқарувни йўқотди. Бу ҳақда 23 январ, жума куни Bloomberg агентлиги хабар берди.
Агентлик маълумотларига кўра, LR2 синфидаги кема тахминан 730 000 баррел Urals туридаги Россия нефтини ташиган ва Шимолий Африка соҳиллари бўйлаб шарқ томон, Сувайш канали сари ҳаракатланаётган бўлган. Аммо чоршанба куни тушдан кейин Жазоирдан ўтиб кетгач, танкер кутилмаганда кескин шимол томон бурилиб, денгиз қатнов йўлларидан чиқиб кетган. Пайшанба куни эрталаб унинг навигациядаги ҳолати “бошқариб бўлмайди” деб ўзгарган, тезлиги эса тахминан соатига бир узелгача пасайган.
Bloomberg таъкидлашича, қатнов йўлларидан чиқиш, тезликнинг пасайиши ва бошқарув йўқолиши танкернинг манёвр қила олмаслиги ва истисно ҳолатлар туфайли бошқа кемаларга йўл бериш имкони йўқлигини англатади. Бундай ҳолатларга рул тизими, двигател ёки қувват ускунаси ишдан чиқиши, электр таъминоти узилиши ёки кутилмаган шикастланишлар сабаб бўлиши мумкин.
Бундан бир кун олдин, 22 январ куни, Франция ҳарбий-денгиз кучлари Ўрта Ер денгизининг ғарбий қисмида Россиянинг GRINCH нефт танкерини тўхтатгани маълум бўлган эди. У “соя флоти”га алоқадор бўлиши мумкин, деб гумон қилинган. Операция Испания жанубий соҳили билан Марокашнинг шимолий соҳили орасида ўтказилган.
Франция президенти Эммануэл Макрон операция вақтида Францияни бир неча иттифоқчилар, жумладан Буюк Британия қўллаб-қувватлаганини айтган. Унинг сўзларига кўра, кема халқаро санкциялар остида бўлиб, эҳтимол, сохта байроқ остида юрган.
“Соя флоти” асосан эски кемалардан иборат бўлиб, улар ғарбнинг суғурта ва рўйхатдан ўтказиш тизимларидан ташқарида фойдаланилади. Шу орқали Россия Украинага қуролли бостириб киришидан кейин Евроиттифоқ жорий этган санкцияларни четлаб ўтади.
Халқаро Equasis денгиз маълумотлар базасига кўра, 19 йиллик “Прогресс” танкерини Санкт-Петербургдаги Legacy Marine LLC компанияси бошқаради. Ҳозир кема Россия байроғи остида юради ва ноябр ойида Россия Денгиз кемачилиги реестрига киритилган.
