Энг кам муаммоли автомобиллар – 2026 йил рейтинги

Янги инфографикада 2026 йилдаги энг ишончли автомобил брендлари рейтинги тақдим этилди. Рейтинг экспертлар журнали — Consumer Reports томонидан тузилган прогноз қилинган ишончлилик (predicted reliability) кўрсаткичларига асосланади.

Фото: zr.ru

Consumer Reports деярли ҳар бир янги енгил автомобил, пикап ва йўлтанламас (SUV) учун прогноз қилинган ишончлилик индексини ҳисоблайди. Бунинг учун у ўз обуначиларининг йиллик сўровномаларидан йиғилган маълумотларни таҳлил қилади. Сўровларда автомобил эгалари машиналаридан фойдаланиш жараёнида дуч келган муаммоларни батафсил баён қилади.

Сўнгги тадқиқотда тахминан 380 000 та автомобил бўйича жавоблар ишлатилган. Бу эса брендлар, моделлар ва турли хил куч қурилмалари (двигател/гибрид тизимлар) кесимида ишончлиликка оид барқарор қонуниятларни аниқлаш имконини берди. Якуний умумлаштирилган натижалар автомобилларни баҳолаш ва ўзаро таққослаш, шунингдек, бензинли, гибрид, уланувчи гибрид (plug-in) ва тўлиқ электр моделлар ўртасидаги фарқларни таҳлил қилиш учун қўлланади.

2026 йилда япон брендлари еттиликнинг биринчи ўринларидан олтитасини эгаллади. Рейтинг етакчиси — Toyota, ундан кейин зич равишда Subaru ва Lexus келади. Бу ишлаб чиқарувчилар консерватив муҳандислик ёндашуви, моделларнинг узоқ ҳаёт цикли ва синовдан ўтган технологияларга таяниш сиёсати билан яхши танилган.

Toyota автомобиллари тўғри хизмат кўрсатилган тақдирда 300 000 километрдан ортиқ ресурсга мўлжаллаб лойиҳаланади. Бунга ишлаб чиқаришнинг барча босқичларида қатъий сифат назорати ва потенциал носозлик нуқталарини камайтирадиган соддалаштирилган куч қурилмалари ҳисобидан эришилади.

Honda ва Nissan ҳам юқори натижалар кўрсатиб, Япониянинг узоқ хизмат қиладиган ва ишончли автомобил техникаси соҳасидаги етакчилигини тасдиқлади.

Европа автомобил ишлаб чиқарувчилари рейтингнинг асосан ўрта қисмида жойлашди. Улар орасида энг яхшиси — BMW бўлиб, у умумий ҳисобда 5-ўринни эгаллади ва айрим япон рақобатчиларини ортда қолдирди.

Шу билан бирга Volkswagen, Audi, Mercedes-Benz ва Volvo пастдан ўртача 40 балл атрофи диапазонида баҳоланди. Бу уларнинг ишончлилик кўрсаткичлари нисбатан камтар эканини англатади.

Tesla эса олдинги тадқиқотга нисбатан энг сезиларли ўсишни намоён қилди: у дарҳол 8 поғона юқорилаб, 9-ўринга чиқди. Бу ўсишга Tesla Model 3 ва Tesla Model Y моделларининг юқори ишончлилик баҳолари сабаб бўлган — улар конструкциянинг кўп йиллик босқичма-босқич такомиллаштирилишидан фойда кўрган.