CSIS: Россия минимал ютуқлар эвазига катта йўқотиш кўрмоқда

2026 йил январ ойида фронтдаги РФ йўқотишлари армияга кирган янги контрактчилар сонидан ошиб кетган. Bloomberg’нинг ғарб разведкаси маълумотларидан хабардор манбаларига кўра, бу тез орада Кремлни янги сафарбарлик масаласи олдида қолдириши мумкин.

Фото: РИА Новости / Константин Михальчевский

Bloomberg агентлиги 11 феврал, чоршанба куни ғарб разведка хизматларидан бирининг маълумотларини билган манбаларга таяниб хабар беришича, Украинадаги фронтда Россиянинг январ ойидаги йўқотишлари армияга янги кирган контрактчилар оқимидан кўпроқ бўлган.

Bloomberg манбалари келтираётган маълумотларга кўра, 2026 йил январ ойида РФ қуролли кучларига қўшилган янги ҳарбийлар сони Россия армиясининг фронтдаги йўқотишларидан 9000 нафарга кам бўлган. 2025 йил декабрида эса бу кўрсаткичлар тахминан бир-бирига яқин эди. Бироқ қиш мавсумида Россиянинг Украина фронтидаги йўқотишлари сезиларли даражада ошган.

Bloomberg суҳбатдошлари Украина мудофаа вазири этиб янги тайинланган Михаил Федоров таклиф қилган стратегия — Россия армияси йўқотишларини ойига 50 минг кишига етказиш — қисман ўз самарасини беряпти, деб ҳисоблайди. Бундай ҳолатда Кремл олдида янги сафарбарлик масаласи пайдо бўлиши мумкин.

Москва фронтда муваффақиятлар ҳақида баёнот бериб келаётганига қарамай, Вашингтондаги Стратегик ва халқаро тадқиқотлар маркази (CSIS) таҳлилчилари Россия минимал ҳудудий ютуқлар эвазига ниҳоятда катта йўқотишларга учраяпти, деб ҳисоблайди.

CSIS баҳосига кўра, 2022 йил февралидан бери Россия қўшинлари ҳалок бўлганлар, яраланганлар ва бедарак йўқолганлар ҳисобида жами тахминан 1,2 млн кишини йўқотган. Ўтган йил (2025 йил) давомида Россия армиясининг йўқотишлари 425 минг кишини (ўртача ойига тахминан 35 минг) ташкил этган. Бу — Иккинчи жаҳон урушидан бери ҳар қандай қуролли можарода йирик давлатлар ичида қайд этилган энг юқори йўқотишлардан ҳам ошиб кетади. CSIS таҳлилчиларига кўра, РФ ҚК ва Украина ҚКнинг умумий йўқотишлари 1,8 млн кишига етган, баҳорга бориб эса 2 млн чегарасига чиқиши мумкин.

CSIS ҳисоб-китобларига кўра, 2024 йилда ташаббусни қўлга олгандан кейин Россия армияси энг йирик ҳужум операциялари доирасида ўртача кунга 15–70 метр олға силжиган. Бу сўнгги юз йилдаги йирик ҳарбий кампаниялар орасида ҳужум суръатининг энг паст кўрсаткичларидан бири ҳисобланади. Таҳлилчилар баҳосича, 2024 йил бошидан бери Россия Украина ҳудудининг 1,5 фоизидан кам қисмини эгаллаган.

Ғарб разведка маълумотларини биладиган Bloomberg манбаларидан бири ҳам шу баҳоларга қўшилди: Россия армияси ҳозирги суръатда олға силжиса, бутун Донбассни тўлиқ эгаллаш учун унга тахминан икки йил керак бўлади.