“Газпром нефть” бошқаруви раисининг ўринбосари Санкт-Петербургда қўлга олинди

“Газпром нефт” бошқаруви раисининг ўринбосари Антон Джалябов Санкт-Петербургда пудратчи ташкилотлар раҳбарларидан 29 млн рублдан ортиқ суммада пора олганликда гумон қилиниб қўлга олинди. Ҳуқуқни муҳофаза қилувчи органлар маълум қилишича, 27 феврал, жума куни унга нисбатан “ўта йирик миқдорда пора олиш” моддаси бўйича жиноят иши қўзғатилган. Бу модда бўйича 15 йилгача озодликдан маҳрум этиш жазоси назарда тутилган.

ТАСС агентлиги суҳбатдошининг аниқлашича, қўлга олишни Иқтисодий хавфсизлик ва коррупцияга қарши кураш бўйича бош бошқарма ходимлари амалга оширган. Унинг маълумотларига кўра, гап 2020–2021 йилларда содир бўлган икки эпизод ҳақида кетмоқда. Тергов версиясига кўра, Джалябов 28 млн рублга Сочи шаҳрида квартира сотиб олган, шунингдек, унинг ихтиёрига қиймати 1,7 млн рублдан ортиқ бўлган катер ўтган.

Манба таъкидлашича, “тергов ҳисоблашича, пул мукофоти эвазига у йирик қурилиш пудратлари бўйича амалда бажарилмаган ишлар қабул қилингани ҳақидаги ҳужжатларни имзолаган, улар учун тўлов амалга оширилишини таъминлаган ва ишлар муддатини бузгани учун пудратчиларни жарималар ҳамда пенялардан ҳимоя қилган”.

“Интерфакс” агентлиги аниқлашича, Джалябовга қўйилаётган айбловлар Россиянинг Ямал-Ненец автоном округидаги Надим шаҳрида жойлашган “Газпром инвест” компаниясидаги иш фаолияти билан боғлиқ. Жиноят иши Россия Тергов қўмитаси юритувида турибди.

Кутилишича, тез орада унга нисбатан эҳтиёт чораси (қамоқ, уй қамоғи ва ҳ.к.) масаласи ҳал қилинади.

Джалябов 2020–2021 йилларда Надимда “Газпром инвест” филиалига раҳбарлик қилган. 2021 йил март ойидан 2023 йил август ойигача у “Газпром добыча Ноябрьск”нинг бош директори бўлган. 2023–2024 йилларда “Газпром нефт”да бош муҳандис лавозимида ишлаган, 2024 йил апрел ойидан эса “Газпром нефт” бошқаруви раисининг ўринбосари бўлган.