BioNTech асосчилари бошқа компанияга ўтишини эълон қилди

Германиянинг вакцина ишлаб чиқарувчи BioNTech компанияси асосчилари Угур Шоҳин ва Ўзлем Туречи компаниядаги раҳбарлик лавозимларини тарк этишини маълум қилди. BioNTech/Pfizer вакцинаси яратувчилари сифатида танилган иммунолог эр-хотин мРНК тадқиқотларига қайтишни хоҳламоқда ва шу мақсадда янги корхона ташкил этади, деб ёзди 10 март, сешанба куни Reuters агентлиги.

Шоҳиннинг сўзларига кўра, янги компания тузишга жуфтликнинг “яна ихтирочи бўлиш” истаги туртки бўлган. Кутилишича, янги корхона мРНКни қўллаш соҳасидаги тадқиқотлар билан шуғулланади. Бу технология онкологик касалликларга қарши курашишнинг эҳтимолий усулларидан бири сифатида қаралмоқда.

“Биз шуни англадикки, BioNTech’нинг клиник ишланмаларнинг кечки босқичларига қаратилаётган диққати менга ҳам, Ўзлем Туречига ҳам илк босқичдаги тадқиқотларга етарлича вақт қолдирмади, — дея Reuters Шоҳиннинг сўзларини келтиради. — Жуда катта салоҳият мавжуд ва биз уни BioNTech ҳамда янги компания доирасида параллел равишда очиб бериш ниятидамиз”.

Шоҳин ва Туречи йил охирига қадар BioNTech’да қолади, бироқ шу билан бир вақтда ўзи учун ҳисоб бўйича учинчи компанияни ҳам ташкил қилади. Шу билан бирга, BioNTech янги фирмага озчилик улуши эвазига айрим патент ҳуқуқларини тақдим этади.

“Биз уларнинг янги компанияси билан комбинирланган терапияга оид эҳтимолий ёндашувлар бўйича ҳамкорлик қилишни интиқлик билан кутяпмиз”, — дея янгиликка изоҳ берди BioNTech бошқаруви раиси Хелмут Йеггл.

Шоҳин BioNTech’да бош директор лавозимида, Туречи эса компаниянинг тиббий тадқиқотлар бўйича директори лавозимида ишлаб келган. Уларнинг компаниядан кетиши режалаштирилгани ва 2026 йилда BioNTech тушуми қисқариши ҳақидаги хабарлар ортидан фармацевтика корхонаси акциялари қиймати тахминан 17 фоизга тушди.

Майнцлик иммунолог эр-хотин 2020 йилда, COVID-19 пандемияси даврида бутун дунёга машҳур бўлди. Айнан BioNTech ишлаб чиққан вакцина ғарб мамлакатларида вирусга қарши кураш учун маъқулланган биринчи вакцина бўлди.

Вакцина ишлаб чиқилиши дунёнинг энг йирик бешта фармацевтика гигантидан бири бўлган Американинг Pfizer корпорацияси билан ҳамкорликда амалга оширилган. ОАВ аввалроқ хабар беришича, BioNTech формулани тақдим этган, америкаликлар эса вакцина синовларининг учинчи босқичини ташкил қилган, уни рўйхатдан ўтказишга ёрдам берган ва ишлаб чиқариш қувватларини таъминлаган.

Шундан кейин BioNTech компаниясининг фақат 2021 йилнинг дастлабки тўққиз ойидаги соф фойдаси 7,1 миллиард еврога етди. Корхона жойлашган Майнц шаҳри солиқ тушумлари ҳисобига 1980-йиллардан бери тўпланиб келаётган қарзларининг бир қисмини узишга муваффақ бўлди. Жуфтлик эса Германиянинг энг бой инсонлари орасидаги мақомини мустаҳкамлашдан ташқари, кўплаб мукофотларга, жумладан Германиянинг энг юқори мукофоти бўлган “Хизматлари учун орден”га ҳам сазовор бўлди.