Lufthansa Яқин Шарққа парвозлар тақиқини узайтирди

Эрондаги уруш туфайли Lufthansa концернига кирувчи авиакомпаниялар хавфсизлик ва операциявий сабаблар боис 24 октябрга қадар Абу-Даби, Амман, Байрут, Даммам, Ар-Риёд, Эрбил, Масқат ва Теҳрон аэропортларига парвозларни амалга оширмайди. Бу ҳақда 23 март, душанба куни Германия авиакомпанияси матбуот хизмати хабар қилди.

Ушбу чекловлар Lufthansa, Austrian Airlines, Swiss, Brussels Airlines, ITA Airways, Edelweiss ва Lufthansa Cargo рейсларига тааллуқли бўлади.

Мазкур ташувчиларнинг Дубай ва Тел-Авив аэропортларига парвозлари эса 31 майгача тўхтатилиши керак.

Lufthansa Cargo’нинг Тел-Авивга юк рейслари, шунингдек, Eurowings’нинг Исроилдаги ушбу шаҳарга, Байрут ва Эрбилга йўловчи рейслари 30 апрелга қадар амалга оширилмайди.

Air France авиакомпанияси ҳам Дубай ва Ар-Риёдга, шунингдек, ушбу шаҳарлардан амалга ошириладиган рейсларни 31 мартгача тўхтатиш муддатини узайтирди. Шунингдек, Тел-Авив ва Байрутга ҳамда у ердан амалга ошириладиган рейслар 4 апрелгача бекор қилинди.

“Манзиллардаги хавфсизлик билан боғлиқ вазият ва қатор ҳаво ҳудудларининг ёпилиши муносабати билан компания ўз рейсларини тўхтатиб туриш муддатини узайтиришга мажбур”, — дея маълум қилди авиаташувчи.

Исроил ва АҚШнинг Эронга қарши уруши нафақат Яқин Шарқда, балки унинг ташқарисида ҳам авиақатновларга кенг кўламли салбий таъсир кўрсатди. 28 феврал куни операция бошланганидан сўнг нафақат Исроил ва Эрон, балки Ироқ, Иордания, Баҳрайн, Кувайт, Қатар ва Бирлашган Араб Амирликлари ҳам ўз ҳаво ҳудудини тўлиқ ёки қисман ёпди.

Дубай, Абу-Даби ва Доҳадаги асосий аэропортлар ҳам фаолиятини тўхтатди.

АҚШ ва Исроил 28 февралдан буён Эронга ҳаво зарбалари бериб келмоқда. Бу ҳужумлар оқибатида Эрон олий раҳбари Али Хоминаий ҳамда бир қатор юқори лавозимли амалдорлар ва куч тузилмалари вакиллари ҳалок бўлган.

Эрон эса жавоб тариқасида Форс кўрфази минтақасидаги қўшни давлатларга ракета ва дронлар ёрдамида ҳужум қилмоқда. Ислом Республикаси баёнотларига кўра, бу ҳужумлардан кўзланган мақсад минтақадаги АҚШ ҳарбий базаларидир.

Эрон зарбалари оқибатида Форс кўрфазидаги бир қатор мамлакатларда нефт сақлаш омборлари ва нефт ташувчи танкерлар ҳам шикастланган. Бундан ташқари, уруш бошланганидан буён Эрон ҳужумларидан Озарбойжон ва Европа Иттифоқига вақтинча раислик қилаётган Кипр ҳам жабр кўрган.