Дунёда энг кўп миллиардeрлар туғилган шаҳарлар маълум қилинди

Ню-Йорк дунёда миллиардeрлар туғилган асосий шаҳар сифатида алоҳида ажралиб туради. Бироқ у улкан бойлик шаклланадиган ягона глобал марказ эмас. Осиёда Ҳонгконг, Сингапур ва Мумбай каби шаҳарлар ҳам сайёранинг энг бой инсонлари туғилган етакчи манзиллар қаторига киради.

Фото: Getty Imagеs

Янги инфографикада дунё бўйлаб камида 10 нафардан миллиардeр туғилган шаҳарлар акс эттирилган. У 2026 йилда PlayersTime платформаси томонидан Forbes журнали миллиардeрлар рўйхати маълумотлари асосида ўтказилган таҳлилга таянади.

Харита жами 1680 нафар миллиардeрнинг энг кўп учрайдиган туғилган шаҳарларини қамраб олади ва уларнинг географик тақсимотида қизиқарли минтақавий ҳамда қитъавий тенденцияларни очиб беради.

Ню-Йорк Ер юзида энг кўп миллиардeр яшайдиган шаҳар сифатида машҳур. Бироқ унинг глобал муваффақият маркази сифатидаги нуфузи туғилиш босқичиданоқ шаклланган. Таҳлил қилинган миллиардeрлар орасида 69 нафари Ню-Йоркда туғилган — бу дунёдаги ҳар қандай бошқа шаҳардан кўпроқ ва ҳатто АҚШдаги кейинги бешта шаҳар кўрсаткичининг йиғиндисидан ҳам юқори.

АҚШнинг энг йирик шаҳри сифатида Ню-Йорк ўн йиллар давомида молия, тадбиркорлик ва санъат каби юқори даромадли соҳаларнинг жаҳон маркази бўлиб келмоқда. Шу боис, шаҳар глобал тадбиркорлик ва авлоддан-авлодга ўтувчи бойлик шаклланишида ўзига хос ўрин тутади.

Ню-Йоркда туғилган энг бой шахс — Oracle Corporation компанияси раиси ва бош технология директори, шунингдек дунёда бойлиги бўйича олтинчи ўринда турувчи Ларри Эллисон ҳисобланади. Унинг бойлиги қарийб 200 миллиард долларга тенг. Эллисон 1944 йилда Бронксда туғилган, бироқ Чикагонинг Саут-Шор ҳудудида асраб олган ота-онаси қўлида вояга етган.

Ню-Йоркдан кейин миллиардeрлар энг кўп туғилган навбатдаги уч шаҳар Осиёда жойлашган: Ҳонгконг (57), Сингапур (30) ва Мумбай (28). Бу мегаполисларда туғилган кўплаб миллиардeрлар бойликларини АҚШ, Хитой ёки Ҳиндистонда орттирган.

Хитой ва Ҳиндистон мегаполисларидан ташқари, Тайван пойтахти Тайбэй ҳам миллиардeрлар туғилган жой сифатида яхши намоён бўлади: танловда бу шаҳарда туғилганлар сони 11 нафар бўлиб, бу Бостон ва Стокҳолм билан бир хил кўрсаткичдир.

Forbes рўйхатида бойлиги бўйича еттинчи ўринда турувчи Женсен Хуанг Тайбэйда туғилган. У 1963 йилда Тайван пойтахтида дунёга келган ва 30 ёшида Nvidia компаниясига асос солган. Бугунги кунда бу компания бозор капитализацияси бўйича дунёдаги энг йирик компания ҳисобланади. Хуанг ҳозиргача компания президенти ва бош директори бўлиб қолмоқда, унинг бойлиги эса 150 миллиард доллардан ошади.

Рўйхатда келтирилган шаҳарларнинг аксарияти Москва (25)дан Чикаго (15)гача бўлган йирик иқтисодий марказлардир. Шу билан бирга, Африкадаги ҳеч бир шаҳар 10 нафардан ортиқ миллиардeр туғилган жой сифатида рўйхатга кирмаган. Жанубий Америкада эса бундай ягона шаҳар Рио-де-Жанейро (15) бўлган.

Яна бир кутилмаган шаҳар — Германиянинг жануби-ғарбида жойлашган Ингелхайм-ам-Райн (10). Лос-Анжелес (13) ёки Истанбул (11) каби мегаполислардан фарқли ўлароқ, Ингелхайм аҳолиси 40 минг кишидан кам бўлган кичик шаҳардир.

Бу шаҳарда кўп миллиардeр туғилганининг сабаби Boehringer Ingelheim компанияси тарихи билан боғлиқ. У дунёдаги энг йирик хусусий фармацевтика компанияси бўлиб, 1885 йилда айнан шу ерда ташкил этилган ва ҳозирга қадар штаб-квартираси шу шаҳарда жойлашган.

Германиянинг энг бой оилаларидан бири бўлган Берингерлар оиласининг кўплаб вакиллари шу ерда туғилган. Шу туфайли Ингелхайм миллиардeрлар туғилган жой сифатида ўз кўламини анча катта даражада намоён этган.