Трамп икки ҳафталик сулҳ эълон қилди

АҚШ президенти Доналд Трамп Қўшма Штатлар Ҳўрмуз бўғози зудлик билан очилиши шарти билан Эронни бомбардимон қилишни икки ҳафтага тўхтатишини маълум қилди.

Трамп Truth ижтимоий тармоғида сулҳ икки томонлама бўлишини қайд этган.

«Мен Эронга ҳужум қилишни икки ҳафта муддатга тўхтатиб туришга розиман.

Бу икки томонлама сулҳ бўлади!

Бунинг сабаби шундаки, биз барча ҳарбий мақсадларга аллақачон эришдик ва уларни ортиғи билан бажардик. Эрон билан узоқ муддатли тинчлик келишувига жуда яқинмиз.

Биз Эрондан ўн банддан иборат таклиф олдик ва уни музокаралар учун амалий асос деб ҳисоблаймиз», – дея ёзган Трамп.

Эрон ҳукумати сулҳга розилигини тасдиқлаган. Теҳроннинг расмий баёнотида мамлакат «улкан ғалабага эришгани ва жиноятчи Американи ўзининг ўнта банддан иборат режасини қабул қилишга мажбур қилгани» айтилган.

Эрон ташқи ишлар вазири Аббос Ароқчи алоҳида хабарида икки ҳафта мобайнида савдо кемалари ўз ҳаракатларини эронлик ҳарбийлар билан мувофиқлаштирган ҳолда Ҳўрмуз бўғозидан ўтиши мумкинлигини тасдиқлаган. Кейинроқ Трамп Truth ижтимоий тармоғида ушбу хабардан скриншотни эълон қилган.

Эрон давлат нашрлари ёзишича, АҚШ билан тўғридан тўғри музокаралар 10 апрел куни Покистонда бошланади. Оқ уй матбуот котиби Кэролайн Ливитт АҚШ бундай имкониятни муҳокама қилаётганини тасдиқлаган, аммо бу борада Трампнинг расмий баёнотини кутиш кераклигини қайд этган.

The New York Times эронлик расмийлар орасидаги манбаларига таяниб, Теҳрон «Покистоннинг жон ҳолатдаги дипломатик уринишлари» ва сўнгги дақиқада Эронни «мослашувчанлик кўрсатишга» чақирган Хитойнинг аралашуви билан ўт очишни тўхтатиш бўйича таклифни қабул қилгани ҳақида ёзган.

CNN нашри Исроил ҳам икки ҳафталик сулҳга қўшилишини маълум қилган.

Сулҳ айнан қачон кучга кириши ҳозирча аниқ эмас. Доналд Трампнинг баёнотидан кейин Исроил ва Бирлашган Араб Амирликлари Эрондан навбатдаги ракета ва дронлар учиб келгани ҳақида хабар берган.

Трампнинг хабари ўзи томонидан Эронга Ҳўрмуз бўғозини очиш учун берган дедлайнга икки соатча вақт қолганида эълон қилинди. Бундан олдинроқ у агар муҳлат якунига қадар бўғоз очилмайдиган бўлса «бугун тунда бутун тамаддун ҳалок бўлиши» ҳақида ёзганди.

Трампнинг охирги баёнотидан бир неча соат олдин музокаралардаги асосий воситачи бўлиб турган Покистон бош вазири Шаҳбоз Шариф АҚШ президентидан тинчлик келишувига эришиш учун дедлайнни икки ҳафтага суришга чақирганди. Шариф ўз баёнотида Эронга ҳам мурожаат қилиб, «хайрихоҳлик белгиси» сифатида Ҳўрмуз бўғозини очишни сўраганди.