Оқ уй атрофида отишма чиқди

Америка нашрлари ёзишича, ҳужум қилган шахс – 21 ёшли Носир Бест бўлиб, у олдин ҳам Оқ уйга киришга уринганди.

Бу ҳодиса Оқ уйда Доналд Трамп иштирокидаги тадбирда рўй берган отишмадан бир ой ўтмасдан содир бўлмоқда.

Оқ уй атрофида ўнлаб ўқ овозлари эшитилгани ҳақида дастлаб CNN мухбирлари хабар беришди.

ABC телеканали мухбири Селина Ван Х ижтимоий тармоғида ўқ овозлари эшитилиб турган видеони жойлаштирган. Унда мухбир ўз телефонида видео олаётган вақтда отишма бошлангани ва у қўрқиб кетиб, яширингани акс этган.

Постда у шундай ёзиб қолдирган: «Ўқ овозлари эшитилганида мен Оқ уйнинг Шимолий ўтлоғида ўз айфонимда ижтимоий тармоқлар учун видео олаётгандим. Ўнлаб ўқ овозлари чиқди. Бизга брифинглар учун залга югуриш буюрилди. Ҳозир шу ердамиз».

АҚШ Махфий хизмати вакили CNN телеканалига маълум қилишича, маҳаллий вақт билан шанба куни соат 18:00 да (Тошкент вақти билан якшанбага ўтар кечаси соат 03:00) Оқ уй комплексидан ташқарида жойлашган 17-кўча ва Пенсилвания авенюси кесишмасида ўқ узилган.

Номаълум шахс назорат-ўтказиш пунктига яқинлашиб, сумкасидан тўппонча чиқарган ва қўриқчиларга қарата тартибсиз равишда ўт очган. Махфий хизмат агентлари бунга жавобан ўт очишган, қуролли шахс олинган тан жароҳатлари оқибатида шифохонада вафот этган.

Отишма вақтида ҳудуддан ўтиб кетаётган ўткинчи йўловчи ҳам яраланган, унинг аҳволи оғир экани айтилмоқда.

Доналд Трамп ҳам бу вақтда Оқ уйда бўлган. Махфий хизмат ходимлари орасида яраланганлар йўқ.

Трампнинг ўзи Truth Social ижтимоий тармоғида ходимларга «тезкор ва профессионал ҳаракатлари» учун миннатдорчилик билдирди, шунингдек, отишма келтириб чиқарган шахснинг «зўравонликка мойиллиги» бўлгани ҳақида ёзди.

Ҳужум қилган шахс ҳақида нималар маълум?

CNN ва CBS манбалари хабар беришича, гумонланувчи 21 ёшли Носир Бест экани аниқланган, у аввал ҳам Махфий хизмат билан тўқнашган, жумладан, 2025 йил июлида Оқ уйга киришга уринган.

Ўшанда у ҳибсга олинган, судда эса унга Оқ уй ҳудудига яқинлашмаслик мажбурияти қўйилган.

Ўтган йили ушбу ҳодисаларни тергов қилиш жараёнида терговчилар Бест ижтимоий тармоқларда турли баёнотлар бергани, жумладан, ўзини «ҳақиқий» Усама бин Лодин деб даъво қилгани, шунингдек, Доналд Трампга зарар етказиш истагидан далолат берувчи камида битта пост қолдирганини аниқлаганди.

Шу билан бирга, ҳуқуқни муҳофаза қилиш органлари у ўзини тажовузкор тутган ёки қурол ишлатган ҳолатларга дуч келмаган.

Бест сўнгги 18 ой давомида Вашингтонда яшаган.

Трампга суиқасдга уринишлар

Бу воқеа Доналд Трамп иштирокидаги тадбирда содир бўлган отишмадан бир ой ўтмай содир бўлди.

Апрел ойи охирида Washington Hilton меҳмонхонаси фойесида ўқ овозлари эшитилган, бу вақтда пастки қаватдаги залда Оқ уйдаги Мухбирлар уюшмасининг уюштирган тадбир бўлиб ўтаётганди.

Ўшанда президент, биринчи хоним Мелания Трамп ва вице-президент хавфсизлик ходимлари томонидан зудлик билан залдан олиб чиқилганди.

Хавфсизлик хизмати ходимлари ҳужум қилган шахсни зарарсизлантирган. Полиция маълумотларига кўра, унинг ёнида иккита ўқотар қурол ва пичоқлар бўлган.

Ҳужум уюштирган шахс 31 ёшли Коул Томас Аллен бўлиб чиқди, кейинчалик унга АҚШ президентини ўлдиришга уриниш, федерал ходимга қурол билан ҳужум қилиш, шунингдек, оғир жиноят содир этиш мақсадида штат чегарасидан қурол олиб ўтиш айбловлари қўйилди.

Доналд Трамп 2024 йилги сайловолди кампанияси давомида ҳам бир неча суиқасдга уринишларни бошдан кечирганди.