Янги биометрик чегара назорати ЕИ аэропортларида муаммо чиқарди

Европа аэропортлари кенгаши (ACI Europe) маълум қилишича, 10 апрелдан тўлиқ куч билан ишлай бошлаган чегара назоратининг янги биометрик EES тизими Франция, Германия, Бельгия, Италия, Испания ва Греция аэропортларида кўп соатлик навбатларни келтириб чиқарган. The Guardian газетаси ёзишича, ёзги сайёҳлик мавсумига келиб бу ҳолат янада оғирлашиб, “коллапс”га айланиши мумкин.

Фото: Reuters

ACI Europe раҳбари Оливье Янковецнинг айтишича, йўловчилар айрим энг серқатнов соатларда уч соатгача кутишга мажбур бўлган. Ryanair бош директори Майкл О’Лири эса тизимни “тўлиқ шармандалик ва тартибсизлик” деб атаб, уни Brexit учун жазога қиёслаган. У айрим аэропортларда навбатлар тўрт соатгача чўзилаётганини айтиб, EES тизимининг тўлиқ жорий этилишини октябргача кечиктиришга чақирган.

Соҳа вакиллари Европа комиссиясидан чегара хизмати ходимларига ортиқча кечикишлар юзага келганда мазкур тизим ишини тўлиқ тўхтатиб туришга рухсат беришни сўраган. The Guardian хабарига кўра, бундай мослашув чоралари амалда мавжуд, аммо улар барча жойда бир хил қўлланмаяпти.

Миландаги Линате аэропортида EasyJet’нинг Манчестерга парвозига рўйхатдан ўтган 156 йўловчидан атиги 34 нафари самолётга чиқишга улгурган, қолган 122 киши эса назоратдан ўз вақтида ўта олмагани учун рейссиз қолган. Авиакомпания чиптани бепул алмаштиришни таклиф қилган, аммо юз берган ҳолат учун масъулиятни ўз зиммасига олмаган. Бу мисол тизим атрофидаги танқидларни янада кучайтирган.

Европа комиссияси эса танқидларга қўшилмаган. Комиссия маълумотларига кўра, тизим штат режимида ишламоқда ва бир нафар йўловчини расмийлаштириш учун ўртача 70 сония кетмоқда. ACI эса бу рақамни реал вазиятга мос эмас деб ҳисоблаб, амалда жараён бундан қарийб беш баравар кўпроқ вақт олаётганини билдирган.

EES тизими 2025 йил 12 октябрдан босқичма-босқич жорий этилган, 2026 йил 10 апрелдан эса Шенген ҳудудидаги 29 давлат ташқи чегараларида амал қилишнинг тўлиқ босқичига ўтган. Бу тизим паспортга қўлбола муҳр босиш амалиёти ўрнини эгаллайди: энди қисқа муддатга Шенген ҳудудига кираётган ЕИга аъзо бўлмаган давлатлар фуқаролари фото ва бармоқ излари каби биометрик маълумотларни топширади. ЕИ фуқаролари, айрим резидентлар ва бошқа озод этилган тоифаларга ушбу талаб татбиқ этилмайди.