Киевда отишма: 6 киши ҳалок бўлди, 15 киши жароҳатланди

Киевда отишма содир бўлиши оқибатида 6 киши ҳалок бўлди ва 15 киши жароҳатланди. Бу ҳақда шаҳар мэри Виталий Кличко маълум қилди.

Унинг сўзларига кўра, қуролли шахс кўчада ва супермаркетда одамларга қарата ўқ узиши натижасида беш киши ҳалок бўлган. Яна бир аёл олган жароҳатлари оқибатида шифохонада вафот этган

Кличконинг маълум қилишича, 15 киши жароҳатланган бўлиб, улар орасида ёш бола ҳам бор. Унинг қўшимча қилишича, супермаркет ичида ҳам ҳалок бўлганлар борлиги тўғрисида дастлабки маълумот олинган.

Украина ички ишлар вазири Игор Клименко отишма уюштирган шахс қўлга олиш чоғида отиб ўлдирилганини маълум қилди. У супермаркетда гаровга олган тўрт киши қутқарилган.

«Украинская правда» нашрининг ёзишича, ҳужум уюштирган шахс Дмитрий Василченков бўлиб, у Москвада туғилган, сўнгра Бахмут, кейинроқ Киевда яшаган.

Отишма 18 апрел куни Киевнинг Голосеевск туманида юз берган. Василченков аввалига кўчада одамларга қарата ўқ узган, кейин эса супермаркетга кириб, бир неча кишини гаровга олган.

Клименконинг сўзларига кўра, "у билан 40 дақиқа давомида музокара олиб боришга уринишган", бироқ жиноятчи музокарага киришмаганидан сўнг штурм қилиш қарорига қилинган.

Маълум қилинишича, эркак рўйхатдан ўтказилган қуролга эга бўлган. Украина ОАВнинг ёзишича, у Kel-Teс Sub-2000 яримавтомат карабин билан ҳужум уюштирган – овчилик рухсатномасига эга бўлган 25 ёшдан ошган украин фуқаролари бундай қуролга эга бўлиши мумкин.