АҚШда самолёт одам уриб кетди

Американинг Frontier Airlines авиакомпанияси Airbus A321 русумли самолёти Колорадо штатидаги Денвер шаҳри халқаро аэропорти учиш-қўниш йўлагида бир одамни уриб кетди. Ушбу номаълум шахс воқеа жойида ҳалок бўлган.

Тўқнашув оқибатида двигателлардан бирида ёнғин чиққан, шундан кейин самолёт тўхтаган ва йўловчиларни ҳаво тўлдирилган траплар орқали эвакуация қилиш бошланган.

«Биз ҳозиргина кимнидир уриб юбордик. Двигателда ёнғин чиқди», – дея хабар берган учувчи аэропорт диспетчерига.

Йўловчилардан бири томонидан эълон қилинган видеоёзувда самолёт салонида тутун чиққани акс этган: ўт ўчирувчилар аланга ўчоғини бартараф этишган, бортда бўлган 224 йўловчи ва экипажнинг етти нафар аъзосидан ҳеч ким жиддий жароҳат олмаган.

«Биз рўй берган ҳодисадан чуқур қайғудамиз», – дея баёнот берган авиакомпания. Маълум бўлишича, 12 кишида енгил жароҳатлар қайд этилган.

Дастлабки маълумотларга кўра, рўйхат рақами N646FR бўлган A321neo русумли самолёт Лос-Анжелес халқаро аэропортига учиши керак эди.

17L рақамли йўлакдан парвоз маҳаллий вақт билан соат 22:39 га режалаштирилганди. Авиакомпания хабарига кўра, номаълум шахс соат 23:13 да, ҳодиса рўй беришидан икки дақиқа олдин аэропорт тўсиғидан ошиб ўтган.

Эълон қилган аудиоёзувларга кўра, бундан олдин диспетчер Frontier учувчисига парвозга рухсат берган ва хайрли тун тилаганди.

Қисқа танаффусдан кейин ҳаво кемаси командири яна бошқарув минорасига алоқага чиқади ва самолёт одам билан тўқнашиб кетганини хабар қилади.

«Биз учиш йўлагида тўхтаймиз. Бир киши йўлакни кесиб ўтди», – деган у.

«Кеча тунда қоидабузар Денвер халқаро аэропорти ҳудудига кириб, атайлаб тўсиқдан ошиб ўтган ва учиш-қўниш йўлагига югуриб чиққан», – дея маълум қилди АҚШ транспорт вазири Шон Даффи.

«Ҳеч ким ҲЕЧ ҚАЧОН аэропорт ҳудудига бостириб кирмаслиги керак», – дея қўшимча қилган у.

Даффи самолёт тўқнашув вақтида катта тезликда ҳаракатланганини қайд этган. A320 оиласига мансуб лайнерлар парвозга чиқаётганида соатига 250 км тезликда ҳаракатланади.

Йўловчилар эвакуациядан сўнг терминалга қайтарилган, улар авиакомпаниянинг бошқа рейсида манзилларига жўнаб кетган. Федерал авиация маъмурияти ва Миллий транспорт хавфсизлиги кенгаши суриштирув ишларини олиб бормоқда.