Кот-д'Ивуар какао нархи тушиши сабабли бюджетини қайта кўриб чиқади

Фото: Reuters

Дунёда какао ишлаб чиқарувчи энг йирик давлат Кот-д’Ивуар ўтган йил ўртасида какао нархи тушиб кетгани сабабли 2017 йил учун бюджетини қайта кўриб чиқади. Бу ҳақда Bloomberg ахборот агентлиги хабар бермоқда.

Мамлакатнинг алоқа, иқтисодиёт ва фан вазири Бруно Коне какао нархининг кескин пасайиши мамлакат иқтисодиётига таъсир қилмаслигига ишончи комиллигини айтган.

"Кот-д'Ивуарда какао нархи пасайганига қарамасдан, бу харажатларга бардош бериш учун захиралар етарли. Бу анчагина пасайиш бўлади, бироқ мамлакат молиявий мувозанатининг йўқолишига олиб келмайди. Бунда ҳеч қандай фожиали нарса йўқ", деб айтган вазир.

Кот-д'Ивуарнинг 2016 йилги бюджет дефицити ялпи ички маҳсулотининг 3,8 фоизини ташкил қилган. Ҳукумат 2017 йилда бу кўрсаткич 3,4 фоизгача қисқаришига умид билдирмоқда.