Швейцарияда “какаоли ёмғир” бўлиб ўтди

Швейцариянинг Ольтен шаҳрида ўтган ҳафта антиқа ёмғир кузатилган. Таъкидланишича, бу ерда бир неча кун давомида ёмғир жигарранг бўлган. Аниқланишича, бунга маҳаллий қандолатчилик фабрикасидан шамол учириб кетган какао зарралари сабаб бўлган.

Фото: oltnertagblatt.ch

Одамлар автомобиллар, уйлар ва ер шоколад ранг билан қопланганидан бир томондан таажжубланса, бошқа томондан хавотирга тушган. Шундан кейин бунинг сабаби нима эканлигини аниқлашга киришиб кетилган.

“Айбдор” эса тезда топилган. Аниқланишича, у Ольтен яқинида жойлашган Lindt & Sprüngli компаниясига тегишли фабрика бўлган. Компания вакилларининг таъкидлашича, корхонада шамоллатиш тизими ишдан чиққан ва шу сабабли какао кукуни ташқарига чиқиб кетган. Сўнгра уни шамол тўзғитиб юборган.

Фабрикада носозлик бартараф этилган ва “какаоли ёмғир” одамларга ва атроф-муҳитга ҳеч қандай хавф солмаслиги айтилган. Шунингдек, компания вакиллари транспорт ва уйларни какаодан тозалаш бўйича барча харажатларни қоплашга ваъда берган.