Ўзбекистонда қамоқдан озод этилган шахсларга 2,25 млн сўмдан пул тўланади

«Аҳолини ижтимоий ҳимоя қилиш тизимини молиялаштириш тартиб-таомилларини такомиллаштириш тўғрисида»ги президент фармони қабул қилинди.

Ҳужжатга мувофиқ, 2025 йил 1 майдан озодликдан маҳрум этиш жойларидан озод қилинган шахсларга БҲМнинг 6 баравари (2,25 миллион сўм) миқдоридаги бир марталик нафақа пули «Инсон» ижтимоий хизматлар марказлари орқали тўланади.

Шунингдек, фармонга кўра, 2025 йил 1 апрелдан «Ижтимоий дафтарлар» жамғармалари орқали кўрсатиладиган ижтимоий ёрдамлар Камбағал оилалар реестрига киритилган оилаларга, уй-жой шароитларини яхшилаш ва соғлиқни сақлаш бўйича ижтимоий ёрдамлар эса – ойлик даромади оила аъзоларининг ҳар бирига минимал истеъмол харажатлари миқдорининг 2 бараваридан кўп бўлмаган оилаларга ҳам тақдим этилади.

Эслатиб ўтамиз, 2024 йилнинг октябр охирларида Инсон ҳуқуқлари бўйича Миллий марказ директори Акмал Саидов Ўзбекистондаги жазони ижро этиш муассасаларида жазо муддатини ўтаётган маҳкумлар сони ҳар 100 минг аҳолига ҳисоблаганда 68 нафарни ташкил этишини маълум қилганди. «Бу кўрсаткич Мустақил давлатлар ҳамдўстлигига аъзо мамлакатлар орасида энг паст даражада», деганди у.

Жорий йилнинг феврал бошларида эса Ўзбекистонда жазо муддатини ўтаётган маҳкублар тасдиқланган рўйхат бўйича 1 та китоб ўқиб, белгиланган имтиҳонни топширса жазо муддати 3 кунгача қисқартирилиши мумкинлиги тўғрисида хабар берилганди.