“Юлдузлар жанги”нинг саккизинчи эпизоди намойиши 2017 йил декабрига қадар қолдирилди

“Юлдузлар жанги” киносагасининг саккизинчи эпизоди 2017 йил 15 декабрда катта экранларда намойиш этилади. Бу ҳақда Walt Disney компанияси сайтида хабар қилинди. Сценарий муаллифи ва картина режиссёри Райан Жонсон шу йилнинг февралида Лондонда тасвирга олиш ишларига киришади.

Премьеранинг етти ойга сурилиши еттинчи эпизоднинг фавқулодда муваффақиятга эришгани билан изоҳланди. Аввалига навбатдаги фильм 2017 йилнинг 26 майида намойиш қилиниши режалаштирилган эди.

2016 йил декабрида “Юлдузлар жанги: Қувғин” фильмининг премьерасини ўтказиш режалаштирилган. Спин-офф (муваффақиятга эришган кино эпизодларидан фойдаланилган бошқа бадиий ижод намунаси) яратувчилари картина киносаганинг навбатдаги барча фильмларига қараганда реал ҳаётга яқинроқ бўлишига ваъда беришмоқда.

Декорациялар ва қаҳрамонларнинг ташқи қиёфаси устида ишлаган дизайнер Нил Сканланнинг қайд этишича, янги тасманинг ҳақиқатга яқинлиги дроидлар ва ўзга сайёраликлар тасвирини юқори даражага олиб чиқилгани таъминлайди.

“Қувғин”да тасвирланадиган воқеалар “Ситхлар интиқоми”дан “Янги умид”гача бўлган ҳодисалар (учинчи ва тўртинчи эпизодлар)ни ўз ичига олади. Бош қаҳрамонлар “Ўлим юлдузлари” чизмаларини ўғирлаш учун бирлашган курашчилар бўлади. Январь ойида айрим Ғарб ОАВлари спин-оффда Дарт Вейдернинг чиқишини ҳам маълум қилишган эди, аммо бу ҳозирча тасдиқлангани йўқ.