«Чириган жасад изидан» – Ўзбекистонда ўлдирилган Туркия фуқаросининг қотиллари қандай топилди?

Ўзбекистонда ресторан очмоқчи бўлган туркиялик тадбиркорлар ўзаро жанжаллашиб қолди: машинада бошланган муштлашув Бухоро даштларидаги қотиллик билан якунланди. Қотиллар ижарага олган машина ортидан икки давлат полицияси жиноятни фош этди.

2025 йил 17 октябр куни Бухоро вилояти Қоровулбозор тумани ҳудудидан ўтган йўл яқинида мол-қўй боқиб юрган чўпон уст қисман тупроқ билан ёпилган жасадга дуч келади. Воқеа юзасидан ҳуқуқни муҳофаза қилиш идоралари текширув бошлайди.

Туркиядаги Haberturk нашрининг ёзишича, Ўзбекистон ҳуқуқни муҳофаза қилувчи органлари ўтказган текширув натижасида гарчи жасаднинг катта қисми чириб кетган бўлса-да, марҳум пичоқлаб ўлдирилгани аниқланган.

Шундан сўнг, жасаднинг шахсини аниқлашга киришилади. Бунда дастлаб жасадни ташлаб кетган автомобилнинг давлат рақами топилади. Ушбу автомобил эса 51 ёшли Туркия фуқароси Суат Т. томонидан ижарага олингани маълум бўлган.

Нашрнинг ёзишича, терговчилар автомобилда луминол текширув ўтказиб, унда қон изларини топган. Олинган қон намуналари Қоровулбозор туманидан топилган жасад билан мос келади.

Маълумот учун, луминол текшируви — бу криминалистикада жиноят жойидаги кўзга кўринмас, ювиб ташланган ёки жуда кам миқдордаги қон изларини аниқлаш учун қўлланадиган махсус кимёвий усулдир.

Марҳум аллақачон Туркияда бедарак йўқолганга чиқарилганди

Ўзбекистон куч тузилмаларининг тезкор қидирув маълумотлари Туркия полициясига етказилган. Шунга кўра Истанбул Жамоат хавфсизлиги бошқармасининг «Қотиллик бўлими» ходимлари автомобилни ижарага олган Суатни кузатувга олган. Шунингдек, ўрганишлар давомида Суат шерикликда ресторан очишни режалаштирган Кадир Тунч билан 2025 йил 28 май куни Ўзбекистонда бўлгани аниқланган.

2025 йил 3 июн куни эса 49 ёшли Кадир Тунчнинг қариндошлари унинг бедарак йўқолгани ҳақида ариза бергани маълум бўлади.

Бу орада полиция Ўзбекистондан юборилган ДНК намуналари билан Кадир Тунчнинг фарзандларидан олинган намуналарни солиштирган. Текширув натижасида Ўзбекистонда топилган жасад Кадир Тунч экани тасдиқланган.

Қотиллик тафсилотлари

Шундан сўнг Истанбул Жамоат хавфсизлиги бошқармаси ходимлари Суат Т. ҳамда яна 3 нафар гумонланувчини қўлга олган. Гумонланувчилар сўроқда қотилликни тан олган ва воқеа тафсилотларини айтиб берган. Терговда кўрсатма берган Суатнинг айтишича, у таниши бўлган Кадир Тунч билан Ўзбекистонда ресторан очишга тайёргарлик кўрган:

«Келишув қилиш учун мен ва икки дўстим Ўзбекистонга бордик. Икки кундан сўнг Кадир Тунч ҳам келди. Аммо ўша куни ўзаро келиша олмай, ишни бекор қилдик», деган у. Келишув бекор бўлгач, автомобилда бирга қайтаётган пайтда улар ўртасида жанжал чиққан:

«Мен машинани ҳайдаб келаётгандим, ёнимда Кадир ўтирарди. Бу келишув учун унга 20 минг доллар бергандим. Келишув амалга ошмагач, пулимни қайтаришини сўрадим. У пулни сарфлаб юборганини, қайтара олмаслигини айтди. Шундан кейин орамизда муштлашув бошланди».

**Истанбул Жамоат хавфсизлиги бошқармаси томонидан қўлга олинган гумондорлар**

Машина ичида муштлашув бошлангач, автомобилни йўл чеккасига тўхтатишади. Бу жанжалда Кадир Тунч пичоқлаб қўйилганди.

«Жанжал пайтида аниқ нима қилганимни эслай олмайман. Ўзимни йўқотиб қўйганман. Бир пайт унинг қон ичида қолганини кўрдим. Бир оздан сўнг у вафот этди. Ваҳимага тушдик. Жасад билан йўлдан бироз ичкарига кириб, уни машинадан туширдик. Чуқур қазий олмадик. Устини тупроқ билан ёпиб, у ердан қочиб, Истанбулга қайтдик», дейди айбланувчи.

Тўртинчи гумондор

Қотилликдан сўнг кучли ҳаяжонда қолган Суат ижарага олинган автомобилни қайтариб топшира олмаган. Шундан сўнг у Туркиядаги бир танишини Ўзбекистонга юбориб, машинани эгасига топшириш учун пул берган. Қотилликдан бехабар бўлган бу таниши автомобилни ижара олинган жойга топшириб, Туркияга қайтиб кетган.

Нашрнинг ёзишича, ҳозирда Истанбул Жамоат хавфсизлиги бошқармасида тергов ишлари якунланган. 4 нафар гумонланувчининг иши эса судга оширилган.