Ўзбекистонлик талабалар Болгариядаги математика олимпиадасида 15та медални қўлга киритишди

2021 йилнинг 2-7 август кунлари талабалар ўртасидаги Халқаро Математика мусобақаси (IMC — International Mathematical Competition) бўлиб ўтди. Ушбу олимпиадада 55дан ортиқ давлатдан 592 нафар талаба иштирок этди. Жумладан, Massachusetts Institute of Technology, Stanford University, Carnegie Mellon University (АҚШ), Saint-Petersburg State University, Moscow Institute of Physics and Technology (Россия), Rheinische Friedrich-Wilhelms-Universität Bonn, Georg-August-Universität Göttingen (Германия), University of Cambridge, University College London, Imperial College London, University of Manchester (Буюк Британия) ва бошқа нуфузли университетлардан талабалар қатнашишди.

Олимпиадада иштирок этиш учун Ўзбекистон Миллий университети, Урганч давлат университети, Қорақалпоқ давлат университети, Тошкент давлат иқтисодиёт университети, Гулистон давлат университети талабаларидан иборат терма жамоа шакллантирилиб, март ойидан буён тайёргарлик ишлари олиб борилган.

Терма жамоага Ўзбекистон Фанлар академияси қошидаги Математика институти илмий ходимлари мураббийлик қилишган. Шунингдек, талабаларнинг олимпиадада иштироки учун бадал тўлови ҳам мазкур муассаса ҳузуридаги "Математика фани ва таълимини ривожлантиришни қўллаб-қувватлаш жамғармаси" ҳисобидан амалга оширилган.