Ўзбекистон юк авиакомпанияси Венгрияда авиакомпания ташкил этишни режалаштирмоқда

Венгрия ОАВ хабарига кўра, Ўзбекистоннинг My Freighter юк ташувчи авиакомпанияси халқаро кенгайиш бўйича кенг кўламли режалари, жумладан, Венгрияда янги авиакомпания ташкил этиши ҳақида маълум қилган.

Фото: Kun.uz

Венгриянинг Daily News Hungary ва AIRportal.hu электрон нашрлари Ўзбекистон юк авиакомпаниясининг Венгрияда авиакомпания ташкил этиш режаси ҳақидаги мақолани эълон қилди.

Венгрия ОАВ тарқатган хабарларга кўра, Ўзбекистоннинг My Freighter юк ташувчи авиакомпанияси халқаро кенгайиш бўйича ўзининг кенг кўламли режалари, жумладан, Венгрияда янги авиакомпания ташкил этиши ҳақида маълум қилган.

Қайд этилишича, ушбу қарор, шунингдек, яна бир битта мамлакат бўйича ҳаво оператори сертификати (АОC) олингани ҳақида Centrum Holding асосчиси ва бош директори Абдулазиз Абдураҳмонов Central Asia Air Cargo Summit 2024'да маълум қилган.

"Венгриянинг АОC сертификатини қўлга киритиш My Freighter'нинг Европадаги мавқейини мустаҳкамлаш ҳамда Жанубий ва Шимолий Америка, Яқин ва Узоқ Шарқ бозорларига чиқишга қаратилган стратегиясида асосий қадам бўлади", – деб ёзган муаллиф.

Бундан ташқари, компания Ўзбекистоннинг Навоий шаҳрида янги база ташкил этиш ва Лиеж (Белгия) ва Острава (Чехия) шаҳарларига мунтазам юк қатновларини амалга ошириш ниятида экани таъкидланган.

Нашрларда қайд этилишича, My Freighter парки ҳозирда бешта Boeing 767-300ER юк самолётидан иборат. Бироқ компания 2025 йилга бориб ўз паркига яна бешта самолёт қўшиб, 2026 йилга келиб уларнинг умумий сонини 20 тага етказишни режалаштирмоқда.

"My Freighter Ҳонгконгдан Будапештга чартер юк рейсларини амалга оширади, оралиқ тўхташ жойи Ўзбекистон. Компаниянинг Венгрияга самолётда юк ташиш бўйича рухсатноманинг олиши ўзаро алоқаларни мустаҳкамлайди ва Европа бозорларига хизмат кўрсатиш қобилиятини оширади", – деб ёзган Венгрия ОАВ.

Тайёрлаган: Отабек Матназаров

#Венгрия #авиакомпания