Алонсо ишдан бўшади. Класикода ютқазгани учун эмас

Якшанба куни «Барселона» навбатдаги класикода «Реал»ни енгиб, Испания суперкубогини қўлга киритди. Саудия Арабистонида ўтган финалда «Барселона» кўп жиҳатдан устунлик қилди, лекин ҳисобда фақат бир тўп фарқи билан ғалаба қозонди.

Финалдан икки кун ўтиб «Реал» охирги йилларда Европада порлаб чиққан энг ёрқин мураббийлардан бири Хаби Алонсони ишдан бўшатди. Истеъфода асосий сабаб класикодаги мағлубият бўлмади, клуб Хабини ишдан бўшатгани ҳам йўқ. Мураббий майдон ташқарисида ва ўйин давомида захира ўриндиғида кузатилган ҳурматсизлик сабаб ўзи ариза ёзиб ишдан кетди...

Мбаппе йўқ – шоу йўқ

Шу куни «Реал» етакчиси Мбаппе асосий таркибда ўйнамагани «Барселона»ни кичик фаворитга айлантирди. Биринчи бўлимнинг асосий вақтини томоша қилган мухлислар «Реал» Мбаппега қанчалик боғланиб қолганини сезди. Мадрид бутун бўлим давомида деярли ҳеч нарса қила олмади. Лекин «Реал» ҳар қандай ҳолатда кучли жамоа, биринчи бўлимга қўшиб берилган дақиқаларда аввал Винисиус супер гол урди, бўлимнинг охирги сонияларида Мбаппе ўрнига асосий таркибда тушаётган ёш ҳужумчи Гонсало Гарсия ҳисобни тенглаштирди. Унгача «Барса»дан Рафиня ва Левандовски гол урганди.

«Реал» энг асосий юлдузи майдонга тушмаган, ўйини чиқмаётган вақтда ҳам керакли голларни уриб, танаффусга енгилмай чиқиб кетди. Бу топ клубларга хос хусусият. Лекин иккинчи бўлимда барибир «Барселона» кучлилик қилди. Зўр ўйин ўтказган Рафиня ғалаба голини урди. Мбаппе тушгани ҳам «Реал»га ёрдам бермади. Француз шу куни жароҳат билан ўйнагани яққол сезилди, у айтарли имкониятга ҳам эга бўлмади.

Ўйиндан кейин...

«Реал» ва «Барселона» учун бир-бирига енгилиш жуда аламли, ҳар қандай турнирни тарк этишдан ҳам аламлироқ. Алонсо «Барселона»га шармандаларча ютқазгани йўқ, муаммолар гирдобидаги жамоа билан финалда муносиб курашди. Чемпионатдаги ўйинда Алонсо «Барселона»ни енгганди ҳам. Бир сўз билан айтганда, класикода Алонсони истеъфога чиқарадиган ўйин бўлмади.

Шундай бўлса-да, икки кун ўтиб Алонсо истеъфога чиққани эълон қилинди. Ҳатто Фабрисио Романо каби инсайдерлар ҳам билмай қолди Алонсо ишдан кетиши, истеъфо ҳақида ҳеч қандай миш-миш ҳам чиққани йўқ. Бу бир нарсадан дарак берарди: Алонсо ўзи ариза ёзиб ишдан кетган. «Реал» расмий сайтида эълон қилинган баёнотда ҳам мураббий ўз ихтиёри билан ишдан кетганига урғу берилганди. Кейинроқ клуб директори Эмилио Бутрагенио раҳбарият Алонсони ишдан бўшатмагани, мураббий ўзи ариза ёзганини тасдиқлади.

Алонсо истеъфога чиққанидан кейин мухлислар сабабларни муҳокама қила бошлади ва кўпчилик класикодан кейинги бир видеога тўхталаверди. Тақдирлаш маросими вақтида «Реал» футболчилари кумуш медални олгач, Алонсо уларни шоҳсупа ёнидан кетмай, рақибга ҳурмат кўрсатишга чақирди. Лекин Мбаппе бошчилик футболчилар мураббийни очиқчасига рад этиб, унга қўл силтаган кўйи майдондан чиқиб кетди. Алонсо ҳам футболчиларга қўшилишга мажбур бўлди.

Яқиндан олинган видеоларда Мбаппе Алонсога қўлини силтаётиб унга қарата нимадир дегани билинган. Мбаппе аниқ яхши гап айтмаган. Кейин унинг қўл силташига Родриго ва бошқа футболчилар ҳам қўшилган.

Кейинроқ захира ўриндиғидан олинган бошқа видеолар ҳам тарқалди. Унда бир неча футболчи Хаби Алонсо кўрсатма бераётганда уни эшитмай тургани кўринади. Ваҳоланки, Алонсо кўчада қолган мураббий эмас, жаҳон чемпиони, ўз даврининг энг зўр футболчиларидан бири, мураббийликда ҳам Германияда «Бавария»га нон бермаган.

Ва бир нарсани унутманг, Хаби Алонсо баск. Баскониялик мард йигит кўпнинг олдида жаҳлини кўрсатмади, клубга ҳурматсиз қилмади, ҳеч кимни айбламади ҳам. Шунчаки кеча чиққан юлдузларнинг унга нисбатан ҳурматсизлигини қабул қила олмади ва ариза ёзиб ишдан кетди. Хаби ҳақиқий эркак эканини исботлади, мураббийликдан Зиданчасига кетди.

Мураббий ким ўзи?

Испан нашрлари ёзишича, Алонсо раҳбарият футболчиларга жуда кўп ваколат берганидан ҳайратланиб, буни чеклашни сўраган. Ахир футболдаги мураббийнинг ўрни ҳақида Европанинг энг зўр лигаларида, энг зўр даражада ўйнаган Хаби Алонсодан яхшироқ ким билиши мумкин?

Хаби икки авлодни боғлаб турувчи футболчи десак ҳам бўлади. У Англияда old school вакили сифатида «Ливерпул» билан олис 2000-йилларда Чемпионлар Лигасини ютган. Кейин фаолияти охирлаганда Европанинг бош совринини 12 йил ютолмаган Анчелоттининг «Реал»и билан Чемпионлар Лигасида ғолиб бўлган. Бу вақт ичида Алонсо қандай мураббийлар билан ишламаган дейсиз. Ва ана шундай тартиб-интизомни биринчи ўринга қўювчи мураббий ўзи бир вақтлар порлаган клубга қайтиб қараса, футболчилар майдондан ташқарида ҳам кўп нарсани ҳал қиладиган бўлиб кетибди.

Алонсонинг истеъфоси охирги йилларда футболда авж олаётган бир жиддий муаммони кўрсатиб қўйди. Афсуски, бугун футболчилар жамоа бош мураббийи ким бўлишини биз ҳал қиламиз деб ўйлай бошлади. Биз ўзимизнинг футболда шундай ишларни кўриб ҳайрон қолардик, лекин Европада ҳам бу ёмон одат авж олаётганини кўрдик. Албатта, бунга аниқ исбот кўрсатиб бўлмайди, лекин футбол кўриб юрган одам ҳаммасини тушунади.

Клублар ҳамма муаммода мураббийларни айблаб, уларни истаган вақтида алмаштиравериши Клопп, Гвардиола, Симеоне каби бир ерда узоқ ишлайдиган мураббийларни мухлислар учун янада қадрли инсонларга айлантирди. Футболчилар майдондан ташқаридаги масалаларни ҳал қилиши ҳеч қайси клубга яхшилик олиб келмаган.

Менимча, ҳозир футболчилар ижтимоий тармоқда жуда машҳурлиги, футболчининг ўзи бир брендга айланаётгани шу каби муаммоларни келтириб чиқаряпти. Футболчилар қараса, миллионлаб одамлар уларни кузатяпти, катта-катта брендлар реклама бериш учун навбатда. Шунда ҳаммасида бўлмаса ҳам баъзи футболчилар нега мендай бутун бошли бренд турганда бошқалар қарор қабул қилиши керак, деб ўйлай бошлайди. Лекин унутмаслик керак, энг яхши жамоаларда доим мураббий биринчи ўринда бўлган, футболчи эмас.

«Манчестер Юнайтед» айнан Фергюсон бошқарувни тўлиқ назорат қилгани эвазига узоқ йил Англиянинг тенгсиз жамоаси бўлиб келди. Сэр Том Клеверли, Фил Жонс, Крисс Смоллинг каби ўртамиёна футболчиларни ўйнатса ҳам, Англияда чемпион бўлаверарди. Чунки ҳеч қачон футболчилар унга қўлини силтамас, ҳурматсизлик қилмасди. Биттаси ҳурматсизлик қилгани учун не ҳолга тушганини ҳамма билади...

Сэр кийиниш хонасида ҳеч кимни уриб-сўкмаган, лекин «МЮ» футболчилари ютқазиб қўйса, сэрдан гап эшитишни ўйлаб ҳам майдонда борини берган. Ахир сэр шунчаки мураббий эмас, устоз эди. Бугун футболда ана шундай муносабат ва яна... Фергюсонга ўхшаб ўзидан кетган футболчининг калласига бутса отадиган мураббийлар етишмаяптими дейман...