Туркиялик эркак операциядан кейин она тилини унутиб, бошқа тилда гапиришни бошлади

Туркиянинг Коня шаҳрида яшовчи Раҳми Карадемир операция ва ундан кейин кутилмаганда артерияси бекилиб қолиши оқибатида она тилини унутиб, фақат дан тилида гапиришни бошлади. Бу ҳақда шифокорларга таяниб Anadolu агентлиги хабар берди.

Карадемирнинг тиззаси ўтган ҳафта операция қилинган. Икки кундан кейин унинг ўнг қўл ва оёғи фалажланган, шунингдек, у тилдан қолган. Шифокорлар текширувидан кейин унинг мия артерияси бекилиб қолгани аниқланган. Қуюлиб қолган қон олиб ташланган ва беморнинг аҳволи яхшилана бошлаган. Аммо шундан кейин у фақат дан тилида гапиришни бошлаган, турк тилида эса бирорта ҳам сўзни талаффуз қила олмаган.

Эркак узоқ йиллар — қарийб 20 йил Данияда яшаган, охирги 10 йилдан бери Туркияда истиқомат қилиб келади.

Селчук университети шикофори Гекхан Оздемирнинг тушунтиришича, тиббиётда бу каби ҳолатлар кузатилган, аммо жуда камдан кам ҳолатда учраб туради. Унинг сўзларига кўра, инсулт ёки тромбоздан кейин беморлар баъзида тиллардан бирини унутади ёки анчадан бери фойдаланмай келган тилида гапиришни бошлайди.

Мутахассисларнинг ҳисоблашича, бемор яқин вақтлар ичида туркча нутқини тиклаши мумкин. Карадемирнинг ўзи таржимон орқали турк тилини тушунаётгани, аммо ҳеч нарса дея олмаётганини айтган.