Қўшимча функционаллар
-
Тунги кўриниш
Трамп Мадуронинг қўлга олингандан кейинги илк суратини намойиш этди
Мадуро ва рафиқаси кема орқали Ню Йоркка олиб борилади.
АҚШ президенти Доналд Трамп Truth Social ижтимоий тармоғида АҚШ ҳарбийлари томонидан қўлга олинган Венесуэла етакчиси Николас Мадуронинг суратини эълон қилди.
Трамп Николас Мадуро ва унинг рафиқаси Силия Флорес Ню Йоркка етказилишини маълум қилган. Унинг сўзларига кўра, сурат олинган вақтда улар «Иводзима» авиаташувчисидаги вертолёт бортида бўлишган.
3 январга ўтар кечаси АҚШ Венесуэлада ҳарбий операция ўтказди – авиация кучлари пойтахт Каракасда, шунингдек, Миранда, Арагуа ва Ла-Гуайр штатларидаги нишонларга кетма-кет зарбалар берган, махсус топшириқли бўлинмалар эса Венесуэла президенти Николас Мадуро ҳамда унинг рафиқаси Силия Флоресни қўлга олиб, вертолётда мамлакатдан олиб чиқиб кетган.
АҚШ бош прокурори Пэм Бонди Николас Мадуро ва Силия Флоресга нисбатан расмий айблов эълон қилинганини маълум қилди. Унинг сўзларига кўра, уларга нисбатан наркотерроризм, кокаин ташиш, ноқонуний равишда қурол-яроғ сақлаш ҳамда Қўшма Штатларга қарши пулемётлар ва портловчи қурилмаларни сақлаш айбловлари эълон қилинган.
CNN телеканали манбаларига кўра, америкалик ҳарбийлар ярим тунда Мадуро ва унинг рафиқаси ухлаб ётган уйга бостириб кирган ҳамда уларни ётоқхонада қўлга олган.
Ҳозирда АҚШ ҳукумати уларни Ню Йоркка олиб бориш режасини ишлаб чиқмоқда, у ерда улар Манҳэттен федерал суди олдида жавоб беришади.
ABC News хабарига кўра, Мадуро Ню Йоркка олиб борилишидан олдин Гуантанамодаги ҳарбий базага етказилади. Шундан кейин у ФҚБ самолётида Ню Йоркка олиб кетилади.
Мадуронинг қулаши
