Трамп ва Путин Аляскада учрашди, ҳеч қандай келишув бўлмади – асосий воқеалар

Аляскадаги Элмендорф-Ричардсон ҳарбий базасида АҚШ ва Россия президентлари Доналд Трамп ва Владимир Путин ўртасида учрашув бўлиб ўтди.

Бу уларнинг 2019 йилдан бери биринчи шахсий учрашуви, Путиннинг АҚШ президенти билан Россиянинг Украинага кенг кўламли босқини бошланганидан бери биринчи учрашуви ва Путиннинг 2015 йилдан бери Қўшма Штатларга биринчи ташрифи эди.

Учрашув икки ярим соатдан кўпроқ давом этди. Дастлаб президентлар яккама-якка (таржимонлар иштирокида) гаплашиши тахмин қилинган эди, бироқ музокаралар бошланишидан бироз олдин формат ўзгартирилди - Путин ва Трамп билан бирга музокараларда ташқи сиёсат идоралари раҳбарлари Марко Рубио ва Сергей Лавров, шунингдек, АҚШ президентининг махсус вакили Стивен Уиткофф ва Россия президенти ёрдамчиси Юрий Ушаков иштирок этди.

Кўринишидан, ҳеч қандай жиддий келишувларга эришилмади. Музокаралардан сўнг Путин ва Трамп матбуот вакиллари олдига чиқиб, ўз баёнотларини ўқиб эшиттирди - Россия президенти саккиз дақиқага яқин, АҚШ президенти тўрт дақиқадан камроқ гапирди.

Путин Трампга меҳмондўстлик учун миннатдорлик билдирди, Украинадаги «можаро сабабларини бартараф этиш» зарурлиги ҳақидаги баёнотларини такрорлади ва агар Трамп 2022 йилда президент бўлганида уруш бошланмаган бўлишини айтди.

Владимир Путин сўзларидан асосий иқтибослар: Музокаралар конструктив руҳда ўтди. Мамлакатларимиз яқин қўшнилардир. Самолётдан тушганимда, «Хайрли кун, азиз қўшни!» дедим. Украинада содир бўлаётган воқеалар биз учун фожиа ва оғриқдир. Биз украин халқини ҳамиша қардош деб билганмиз. Барқарор ҳал қилиш учун можаронинг асл сабабларини бартараф этиш керак. Албатта, Украина хавфсизлиги таъминланиши керак, биз бу борада ишлашга тайёрмиз. Умид қиламизки, Киев ва Европа режалаштирилган тараққиётни бузиш учун провокациялар уюштирмайди. АҚШ билан ҳамкорлигимиз истиқболга эга. Трамп Россиянинг ўз миллий манфаатлари борлигини тушунади. Унинг айтишича, агар президент бўлганида уруш бошланмасди - мен ҳам унинг фикрига қўшиламан.

Доналд Трамп сўзларидан асосий иқтибослар: Биз бир-биримизни тўлиқ тушуна олмадик. Ҳозирча келишув йўқ. Мен Европа етакчиларига қўнғироқ қиламан, Зеленскийни хабардор қиламан. Биз Россия бизнеси билан ҳамкорлик қилишни интиқлик билан кутмоқдамиз. Биз можарони иложи борича тезроқ тугатмоқчимиз. Биз сезиларли ютуқларга эришдик. Ҳозирча биз келишувга эриша олмадик, аммо биз Путин ва унинг жамоасидан миннатдормиз. Ҳар ҳафта минглаб одамлар ҳалок бўлмоқда, Путин бу можарони тугатишни хоҳлайди - худди мен каби. (Путинга:) Тез орада сиз билан яна кўришишга умид қиламан - кейингиси Москвадами?

Шундан сўнг президентлар журналистларнинг саволларига жавоб бермасдан зални тарк этди.

Саммит дастури қисқартирилди. Дастлаб президентлар учрашувидан сўнг кенгайтирилган форматда (беш кишилик) ишчи тушлик ўтказилиши керак эди, бироқ у бекор қилинди.

Путин матбуот анжуманидан сўнг, дарҳол Элмендорф-Ричардсон базасида дафн этилган совет учувчилари қабрига гул қўйиш учун борди, шунингдек, архиепископ Алексей Ситкинский ва Аляскинский билан учрашди. Кўп ўтмай унинг самолёти Россияга учиб кетди.