Суданнинг собиқ президенти коррупцияда айбдор эканлигига иқрор бўлди

Суданнинг ҳокимиятдан четлаштирилган собиқ президенти Умар ал-Башир коррупция ва пул ювишда айбдор эканлигига иқрор бўлди, деб хабар берди Суданнинг "Ал-Жарида" газетаси ўз манбасига таяниб.

Нашрнинг маълумот беришича, собиқ давлат раҳбари "ўзига қарши эълон қилинган коррупция, ноқонуний хорижий валюта муомаласи ва пул ювиш айбловларига иқрор бўлган". Газетанинг қайд этишича, ал-Башир коррупциявий схемага алоқадор юқори мартабали арбоблар исмини айтган.

ОАВнинг ёзишича, аввалроқ ал-Баширнинг уйидан тинтув вақтида 6 миллион евро, 351 минг доллар ҳамда йирик миқдордаги маҳаллий валюта топилган.

Суданда тўрт ойлик норозилик намойишларидан сўнг 11 апрель куни ҳарбий давлат тўнтариши содир бўлганди. Президент Умар ал-Башир ҳокимиятдан четлаштирилди, сўнгра қамоққа ташланди.