АҚШда радиоактив йўл қурилишига рухсат берилди

АҚШнинг Атроф-муҳитни муҳофаза қилиш агентлиги (EPA) Флорида штатида йўл қурилиши учун радиоактив радий сақловчи материалдан фойдаланишни маъқуллади, деб хабар берди The Hill.

Июн ойида Флорида губернатори Рон де Сантис минтақа транспорт департаментига йўл қопламаларини ётқизиш лойиҳаларида фосфогипсдан фойдаланиш имкониятини ўрганиш мажбуриятини юкловчи қонунни имзолаганди.

Табиатни муҳофаза қилиш гуруҳлари де Сантисни қонун лойиҳасига вето қўйишга чақириб, радиоактив модда сувнинг сифатини ёмонлаштириши ва йўл қурилиш бригадалари орасида саратон касаллигига олиб келиши мумкинлигини таъкидлади. Атроф-муҳитни муҳофаза қилиш агентлиги ҳам қонунни қабул қилиш жараёнида овоз бериш ҳуқуқига эга.

Фосфат ва калий ўғитлари ишлаб чиқарувчи Америка кимё компанияси Mosaic Fertilizer LLC EPA’дан фосфогипс аралашмали учта 200 футлик (ҳар бири 61 метрлик) йўл қисмини қуришга рухсат сўради.

EPA ўзининг дастлабки хулосасида, кичик миқёсли пилот лойиҳани қуришда радиациянинг аҳоли саломатлигига бўлган потенциал хавфи фосфогипсни уюм ҳолатда сақлашдаги хавфдан юқори эмаслигини маълум қилди.

Фосфогипс — фосфоритдан ўғитлар ишлаб чиқаришда ҳосил бўладиган қўшимча маҳсулот. Аввал агентлик ушбу материалдан йўл қурилишида фойдаланилишидан хавотир билдирганди. EPA, хусусан, фосфогипс таркибида радий мавжудлигини, у парчаланиш жараёнида радон гази ҳосил қилишини, ҳар иккала модда ҳам радиоактив экани ва улар саратон касаллигини келтириб чиқариши мумкинлигини маълум қилган.

Бироқ Ўғит институти буюртмаси асосида ўтказилган таҳлиллар кўрсатишича, йўл қурилишида фосфогипсдан фойдаланиш EPA томонидан белгиланган рухсат этилган хавф чегарасидан ортиқ радиоактив нурланиш дозаларини келтириб чиқармайди.