АҚШ Россиянинг “яширин флоти”га тегишли бешинчи танкерни қўлга олди

АҚШ жума куни, 9 январда Россиянинг “яширин флоти” билан боғлиқ бўлиши эҳтимол қилинган навбатдаги нефт танкерини қўлга олди. Olina номли кема Тринидад яқинида, Кариб денгизида тўхтатиб қолинган ва унга АҚШ Қирғоқ қўриқлаш хизмати ходимлари чиққан. Операция ҳеч қандай ҳодисасиз ўтганини АҚШ Қуролли кучларининг Жанубий қўмондонлиги маълум қилди.

Жанубий қўмондонлик Х ижтимоий тармоғидаги постида шундай дейилади: “Бугун идоралараро қўшма кучларимиз яна бир бор аниқ сигнал юборди — жиноятчилар учун хавфсиз паноҳ йўқ. Тонгда ўтказилган операция давомида ‘Жанубий найза’ (Southern Spear) бирлашган тезкор гуруҳи денгиз пиёдалари ва денгизчилар ички хавфсизлик вазирлиги кўмагида USS Gerald R. Ford авиаташувчисидан чиқиб, Кариб денгизида моторли танкер Olina'ни ҳеч қандай ҳодисасиз ушлади”.

Хабарда таъкидланишича, “бундай ушлашлар АҚШ Дэнгиз кучларининг амфибия зарба гуруҳи тўлиқ қудрати билан таъминланади, унга тезкор қўлланишга тайёр ва юқори зарба салоҳиятига эга USS Iwo Jima, USS San Antonio ва USS Fort Lauderdale кемалари ҳам киради”. Постда, шунингдек, АҚШ Мудофаа вазирлигининг “Жанубий найза” операцияси “ноқонуний фаолиятни тўхтатиш ва Ғарбий яримшарда хавфсизликни тиклаш орқали мамлакатни ҳимоя қилиш” миссиясига содиқ қолиши урғуланади.

The Bell нашри ёзишича, Olina танкерининг рўйхатдан ўтказиш рақами 2025 йил январ ойида АҚШ санкциялари остига тушган Minerva M танкери рақами билан мос келади. Minerva M Ғарб чекловларини четлаб ўтиб Россия нефтини ташишда ишлатиладиган “яширин флоти”нинг бир қисми сифатида санкцияга тушган эди.

Reuters агентлиги маълумотларига кўра, Olina Шарқий Тимор байроғи остида юради. Кема охирги марта 52 кун олдин — ноябр ўрталарида Венесуэла соҳиллари яқинида бўлган вақтида ўз жойлашув маълумотларини узатган. Танкер ҳаракати ҳақидаги бу маълумотни Reuters Британиянинг денгиз хатарларини бошқариш компанияси Vanguard маълумотларига таяниб келтирди.

Olina'ни қўлга олиш АҚШ томонидан Венесуэладан нефт экспорт қилишда иштирок этган танкерларни таъқиб этиш операцияси доирасидаги бешинчи ҳолат бўлди. Америка ҳокимияти баҳосига кўра, Венесуэла нефт экспортининг тахминан 70 фоизи “яширин флоти” кемалари ҳиссасига тўғри келади.

Аввалроқ АҚШ Атлантика океанида Россия компаниясига тегишли Bella 1 танкерини ҳам қўлга олган. Кема икки ҳафтадан ортиқ вақт АҚШ ҳарбийларининг таъқибидан қочиб юрган, уни Россия ҳарбий-денгиз кучлари кузатиб борган.

Россия бу танкернинг ушланишини ноқонуний куч ишлатиш акцияси деб атаган.