“Аслида бу – коррупция!” — Шавкат Мирзиёев қурилиш қилиш учун берилган аризаларнинг кўп рад этилиши ҳақида

2025 йилда Ўзбекистонда қурилиш билан боғлиқ 2,6 миллиондан зиёд аризанинг учдан бири рад этилган. Президент Шавкат Мирзиёев 14 апрел кунги селекторда бу рад этишлар аслида коррупция билан ҳам боғлиқлигини айтди.

“Масъуллар “Камчилиги учун қайтардик”, деб айтади. Лекин ичига кириб таҳлил қилса, масала кўп. Ҳамма билиб, билмаганга олади, аслида бу – коррупция! Бунга чек қўйишнинг бирдан бир йўли – рақамлаштириш ва сунъий интеллект!” – деди давлат раҳбари.

Аҳоли ва тадбиркорлар қурилиш қилиш учун аввал лойиҳалашга рухсат олишга, кейин архитектура режалаштириш топшириғи ишлаб чиқишга алоҳида-алоҳида ариза бериб, ойлаб вақт сарфламоқда.

Тошкент шаҳрида 2 та хизматни бир босқичда кўриб чиқиш йўлга қўйилгани учун ҳужжатларни келишиш вақти 3-4 карра камайди. Ушбу тажрибани 1 июлдан бошлаб республиканинг барча ҳудудларида жорий қилиш топширилди.

Ҳозирда электр, газ, сув ва канализацияга уланиш бўйича техник шарт олиш учун ҳам ҳар бир коммунал идорага алоҳида мурожаат қилиш керак. 1 июлдан битта ариза ва битта тўлов билан барча коммунал тармоқларга техник шарт олиш имконини яратиш вазифаси қўйилди.

Шаҳарсозлик кенгашини ҳокимлар бошқаради

Сансалорликнинг яна бир сабаби – жойларда шаҳарсозлик кенгашишга аъзо 26 та идора ўртасида мулоқот ва ҳамкорлик йўқлиги кўрсатиб ўтилди.

Шу боис, шаҳарсозлик кенгашига Тошкент шаҳри ва вилоят ҳокимларининг ўзи бошчилик қилиб, тадбиркорнинг масаласига якуний ечим бериши белгиланди.

Лизингга олинган техникалар учун ҳам балл берилади

“Шаффоф қурилиш” рейтингида қурувчиларга лизингга олинган техникаси учун балл берилмаётгани нотўғри экани қайд этилди. Бундай техникалар ҳисобга олинса, камида 500 та корхонанинг рейтинги 1-2 поғона кўтарилиб, 17 триллион сўмлик бозорга кириш имкони пайдо бўлади.

Қурилиш вазирлигига лизингга олинган техникалар электрон базасини ишга тушириб, “Шаффоф қурилиш” тизимига интеграция қилиш ва балл беришни бошлаш топширилди.

Махсус техника импортига чеклов бекор қилинади

Президент пудрат корхоналарига чет элдан йилига битта махсус техника олиб келиш бўйича чекловни бекор қилиш зарурлигини айтди.

Умуман, мутасаддиларга уч ойда қурилишга рухсат олишдан бошлаб, фойдаланишга топширишгача бўлган барча жараёнларни таҳлил қилиб, талаблар, муддатлар ва тўловларни 2 баробаргача қисқартириш бўйича қарор лойиҳасини киритиш топширилди.

Эслатиб ўтамиз, 2025 йил август ойида тадбиркор Усмонжон Абдусаматов “ассалому алайкум бўлмагунча, қурилишга рухсат беришмайди” дея коррупцияга ишора қилган ҳолда тизимни очиқ танқид қилган эди. Ўшанда Қурилиш вазирлиги унинг устидан ИИВга ариза киритганди.