Доналд Трамп Украина томонга ўтдими?

У президентлик муддатининг бошидан бери биринчи марта Украинага ёрдам ажратишни тасдиқлади. АҚШ Киевни қўллаш бўйича Кўнгиллилар коалициясига қўшилди. Лекин Трампни таъбир қилиб бўлмайди: у ҳақиқатан ҳам украинлар томонга ўтдими ёки эрта-индин яна “айниб қолиши” мумкинми? “Геосиёсат”да сиёсий таҳлилчилар муҳокамаси.

{Yii::t(}

Ўтказиб юбориш 6s

Ўтказиб юбориш

Анвар Йўлдошев: АҚШнинг ҳозирги президенти Трампнинг фикрлари ўзгарувчан, бугунги гапи эртанги чиқишларига тўғри келмаслиги мумкин. Унинг охирги кунлардаги риторикаси Украина фойдасига қаратилган. Лекин давлат котиби Марко Рубио: “Мен Лавров билан гаплашдим ва ўзаро ҳамкорликда давом этамиз” деди.

Трамп бугун ёрдам бераман дейди, эртага ёрдам бермайман дейди, яъни унинг қарорларини аввалдан билиб бўлмайди. Албатта, Кўнгиллилар коалициясига АҚШнинг қўшилгани – Европа учун катта натижа. Чунки Украинага Европанинг ўзи берадиган ёрдам етарлича катта эмас. АҚШнинг коалицияга қўшилиши билан, Украинага берилаётган ёрдам кўпаяди. Бу Россиянинг манфаатига, албатта, тўғри келмайди.

Шуҳрат Расул: Трампнинг характерини бугунги кунда ҳамма билиб бўлди. Бугун ёрдам бераман, деяпти. Балким, ростдан ҳам кейинги ҳафтанинг охирига “мен яна Путин билан телефонда гаплашдим ва Путин зўр йигит, мана биз урушни тўхтатиш масаласи бўйича салкам келишиб қўйдик, мана кўрасизлар, яқинда Путин бу ҳақда ўзи гапиради” дейиши ҳам мумкин... Лекин бу сафар Трампнинг гаплари фақат гап бўлиб қолмаяпти, бирдан амалий ҳаракатлар бошланди. Буни ҳам биз эътироф этишимиз керак. Гап фақат учта Patriot тизимлари ҳақида эмас, 500 млн долларлик ҳажм ҳақида кетяпти. Шундан 300 миллиони Америка Қўшма Штатлари берадиган қуроллар ва яна Европанинг ўзи ҳам 200 миллион қўшмоқчи бўляпти. Муддатлар аниқ кўрсатилган, яъни июлнинг охиригача мана шу катта ёрдам берилиши керак.

Куала-Лумпурдаги ASEAN давлатлари саммитида Марко Рубио ва Сергей Лавров учрашув ўтказди. Рубио: “Агар Россияда тинчлик ўрнатишга интилиш бўлса, биз албатта қўллаб-қувватлаймиз” деган маънода фикр билдирди. Бу – менимча, соф дипломатик гап холос. Эътиборимни тортган жиҳат, Лавров Рубиога битта катта жилд – гўёки ҳужжатлар тўпламини топширди. Унда Украина президенти ва расмийларининг Россияга нисбатан ҳақоратомуз муносабатда эканини исботловчи иқтибослар жамлаб чиқилган экан. Бу воқеа дунё медиасида кулгига қолди.

Зокир Усмонов: Трамп коалицияга қўшилиб, урушга геосиёсий жиҳатдан эмас, иқтисодий жиҳатдан ёндашяпти. Чунки унинг асосий мақсади – АҚШнинг юкини енгиллатиш. Иккинчи жаҳон урушидан бери Европа мудофааси учун асосий харажатларни Вашингтон ўз бўйнига олган эди. Бугунги кунда Трамп юритаётган сиёсат Америкага қисқа ва ўрта муддатда даромад беради, лекин стратегик жиҳатдан Вашингтон ютқазади. Геосиёсатда иқтисодий жиҳатни биринчи ўринга қўйиб ёндашиш ўзини оқламайди.

Трампнинг бундай ёндашуви оқибатида Европанинг субъектлиги ортиб, ўз мудофаа саноатини ҳам шакллантиряпти, АҚШнинг бу жойда йўқотадиган нарсаси кўп. Нима бўлганда ҳам, АҚШнинг Кўнгиллилар коалициясига қўшилиши – Россияга нисбатан бир зарба сифатида кўрилади.

Суҳбатни тўлиқ шаклда YouTube платформасида томоша қилишингиз мумкин.

НормуҳаммадАли Абдураҳмонов суҳбатлашди.