Россия Киевга ёпирилма зарба йўллади

Россия қуролли кучлари 27 декабрга ўтар кечаси дронлар ва ракеталардан фойдаланган ҳолда Украина ҳудудларига навбатдаги ҳужумни амалга оширди. Ҳужумларнинг асосий нишони Киев бўлган.. Украина президенти Володимир Зеленскийнинг сўзларига кўра, Россия бир кечада 500 га яқин дрон, шунингдек, 40 та ракета, жумладан, «Кинжал» комплексидан учирилган ракеталарни қўллаган.

Зеленскийнинг сўзларига кўра, энергетика объектлари ва турар жой бинолари зарба остида қолган. Украина ички ишлар вазирлиги 10 дан ортиқ турар жой биноларига зарар етганини маълум қилди. Маҳалий пабликларда Киевдаги ҳужум нишони Иссиқлик электр станциялари бўлгани ёзилган.

Киевда ҳужум оқибатида бир киши ҳалок бўлиб, 32 киши яраланган, шундан икки нафари болалар. ИИВ хабарида Киев областининг Белая Церков шаҳрида ҳам бир киши ҳалок бўлгани айтилган.

Украина Энергетика вазирлиги Россия мамлакат энергетика тизимига йирик ҳужум уюштирганини маълум қилди. Киев шаҳри ва области, шунингдек, Черниҳив областидаги истеъмолчилар электр таъминотисиз қолган. Украина бош вазири Юлия Свириденко Киев шаҳри ва Киев областида энергетиклар 600 минг истеъмолчини электр энергияси билан таъминлашни тиклаш устида ишлаётганини маълум қилган.

Киевда Днипро дарёсининг чап соҳилидаги айрим ҳудудлар электр энергиясидан узилган. Бундан ташқари, шаҳарнинг бир қисми иссиқлик таъминотисиз қолган. Шаҳар мэри Виталий Кличконинг аниқлик киритишича, 2600 дан ортиқ турар жой бинолари, 187 та болалар боғчаси, 138 та мактаб ва 22 та ижтимоий соҳа объекти иссиқлик таъминотидан узилган.

Зеленский Киев бўйлаб зарбаларга муносабатида Россия урушни якунлашни истамаётганини таъкидлади:

Шу кунларда саволлар кўп бўлди. Қўшма Штатлар ва бутун дунё томонидан урушни тугатиш бўйича берилган таклифларга Россиянинг жавоби қани? Россия вакиллари узоқ музокаралар олиб боради, лекин аслида уларнинг номидан «Кинжал» ва «Шаҳид»лар гапиради. Бу Путин ва унинг атрофидагиларнинг асл муносабати. Улар урушни тугатишни истамайди ва Украинага кўпроқ оғриқ етказиш ҳамда дунёнинг бошқа қисмига босимни ошириш учун ҳар бир имкониятдан фойдаланишга ҳаракат қилмоқда.

Ва бу жавоб учун етарлича босим йўқлигини англатади. Агар Россия ҳатто Рождество ва Янги йил вақтини вайрон бўлган уйлар ва ёниб кетган квартиралар, вайрон бўлган электр станциялари вақтига айлантирса, бундай фаолликка фақат ҳақиқий кучли қадамлар билан жавоб бериш мумкин. Америка шундай имкониятга эга, Европа шундай имкониятга эга, кўплаб ҳамкорларимиз шундай имкониятга эга. Муҳими – бу имкониятдан фойдаланиш.

Ўз навбатида, Россия мудофаа вазирлиги Россия қуролли кучлари «Украинанинг Россия ҳудудидаги фуқаролик объектларига уюштирган террорчилик ҳужумларига жавобан» ёпирилма зарба берганини маълум қилди. Зарбалар нишони энергетика инфратузилмаси объектлари ва ҳарбий-саноат комплекси корхоналари бўлди, дейилади Россия томони баёнотида.

Трамп ва Зеленский учрашуви арафасидаги ҳужум

Россия Украинага Володимир Зеленский ва АҚШ президенти Доналд Трамп ўртасида бўлиб ўтиши кутилаётган навбатдаги музокаралар арафасида ҳужум қилди. Уларнинг учрашуви Тошкент вақти билан 29 декабрга ўтар кечаси Трампнинг Флоридадаги Мар-а-Лаго қароргоҳида бўлиб ўтиши режалаштирилган.

Учрашув олдидан Зеленский Трамп билан урушни тугатиш масаласини муҳокама қилмоқчилигини, шунингдек, Россиянинг Донбасс ҳудудлари бўйича талаблари бўйича янги келишувга эришмоқчилигини айтганди. Унинг сўзларига кўра, АҚШ ва Украина ўртасидаги икки томонлама келишувларнинг кўп жиҳатлари аллақачон белгиланган. Хусусан, АҚШ Украинага шартномани узайтириш имконияти билан 15 йилга хавфсизлик кафолатларини таклиф қилган. «Аммо бизга бундан кўпроқ вақт керак», – деган Зеленский Axios’га берган интервюсида. У Трамп бу муддатни узайтиришга рози бўлишига умид қилмоқда.

Шу билан бирга, Трамп Politico нашрига берган интервюсида Украина президенти билан «яхши» учрашув ўтказишга умид қилаётганини айтди. У Зеленскийда «ўзи маъқулламагунича ҳеч нарса бўлмаслиги» ҳақида огоҳлантирган. Трамп тез орада Россия президенти Владимир Путин билан ҳам телефон орқали гаплашмоқчи эканини қўшимча қилган.

АҚШ ва Европа расмийлари Трамп ва Зеленскийнинг учрашуви самарали бўлишига умид қилмоқда, деб хабар берди CNN. Шу билан бирга, европаликлар Трамп билан ҳар қандай учрашув натижасини олдиндан айтиб бўлмаслигини тан олишади. «Трамп билан хавфсиз вариантлар йўқ», – деган телеканалга НАТО расмийларидан бири.

Европалик сиёсатчилар Флоридадаги учрашувда иштирок этмайди. Аммо улар Трамп ва Зеленский билан музокаралардан олдинроқ телефон орқали гаплашади.