Малайзияда бўлиб ўтган “QS Highеr Education Summit: Asia Pacific – 2023” саммитида Тошкент давлат иқтисодиёт университетига “5 Stars” сертификати топширилди  

QS World University Rankings – университетларнинг халқаро даражадаги рейтингини баҳолаб берувчи энг нуфузли агентликлардан бири ҳисобланади. Ҳар йили эълон қилиб бориладиган натижаларга кўра, Тошкент давлат иқтисодиёт университети Ўзбекистондаги олий таълим муассасалари орасида биринчи бўлиб энг юқори натижа – 5 юлдузни қўлга киритди. Ушбу рейтинг тизими халқаро миқёсда университетни кучли томонларини яхлит кўриш имконини беради.

Тошкент давлат иқтисодиёт университетининг академик мукаммалликка, илғор тадқиқотларга ва талабаларга йўналтирилган ёндашувлари, юқори даражадаги таълимни таъминлаш ва ўсиш учун қулай муҳитни яратишга қаратилган саъй-ҳаракатлари “QS Stars” рейтингида алоҳида эътироф этилди ва унинг олий таълим соҳасидаги сифат маёғи бўлиб университет мавқейини янада мустаҳкамлади.

2023 йилнинг 7-9 ноябр кунлари Малайзияда “QS Highеr Education Summit: Asia Pacific – 2023” саммити бўлиб ўтди ва унда Тошкент давлат иқтисодиёт университети делегацияси ҳам иштирок этди.

Саммитда турли мавзуларда муҳокамалар, маърузалар, тақдимотлар ва “QS Stars” рейтингида 5 юлдузни қўлга киритган олий таълим муассасаларини тақдирлаш маросими бўлиб ўтди. Маросимда QS Quacquarelli Symonds компаниясининг вице-президенти Бен Соутер (Ben Sowter) томонидан Тошкент давлат иқтисодиёт университети жамоасига олий даражали “5 Старс”ни тасдиқловчи сертификат топширилди. Шунингдек, Тошкент давлат иқтисодиёт университети ва QS Quacquarelli Symonds компанияси ўртасида QS Asia University Rankings Tracker маълумотлар базаси обунаси учун шартнома имзоланди.

Саммит доирасида Тошкент давлат иқтисодиёт университети саммит меҳмонлари билан учрашувлар ўтказди. Хусусан, QS Quacquarelli Symonds компаниясининг бош ижрочи директори (CEO) Jessica Turner, Малайзиядаги Ўзбекистон элчихонасининг Савдо-иқтисодиёт масалалари бўйича маслаҳатчиси Фарҳод Эргашев, Малайзия қироллик шаҳзодаси Али Уддинуддин Ибни Туанку Муҳриз, QS Quacquarelli Symonds компаниясининг бош консултантлари Жак де Шампшенел ва Заим Сиддиқилар, Малайзиянинг UCSI университети ректори Ҳамисаҳ Бинти Тапсир, дунёнинг Топ-10 рўйхатига кирган етук олима Сю Мой Пханг ва бошқа илмий ҳамжамият вакиллари билан учрашувлар бўлиб ўтди. Мазкур учрашувларда университетдаги халқаро талабалар, таълим олиш тиллари, таълим йўналишлари, Малайзиядаги нуфузли олий таълим муассасалари билан ўзаро ҳамкорлик қилиш, илмий нашрлар сифати ва сонини ошириш бўйича яқиндан ҳамкорлик қилишга келишиб олинди.

Саммит якунида, Тошкент давлат иқтисодиёт университети Осиёдаги энг яхши университетлар 450 талигига киритилганлиги маълум қилинди. Бундан ташқари, Марказий Осиёдаги энг кучли 23 таликдан жой олгани ҳам эътироф этилди. Бунда TDIU Ўзбекистон олий таълим муассасалари орасида (TIQXMMI ва Ўзбекистон миллий университетидан кейинги) 3-ўринни эгаллаганлиги маълум қилинди ва ҳар иккала рейтинг сертификатларини университетнинг Академик фаолият бўйича проректори профессор Мансур Эшов масъуллардан тантанали равишда қабул қилиб олди.

“QS Higher Education Summit Asia Pacific 2023” саммити 2023 йил 9 ноябр куни ўз ишини якунлади.

Реклама ҳуқуқи асосида