Оқ эмас, кўк-сариқ байроқ кўтардик – Зеленский урушнинг 4-йилида мурожаат йўллади

Украина президенти Россия босқини бошланганининг 4 йиллигида халқига мурожаат йўллаб, Украина ўз давлатчилигини сақлаб қолганини, Путин «уч кунлик» деб бошлаган ҳужумида ғалаба қилолмаганини таъкидлади.

Украина президенти Володимир Зеленский катта уруш бошланганининг тўрт йиллигида украинларга мурожаат қилди. У ўз мамлакати ва аҳолиси 2022 йил 24 февралидан буён қанчалик катта йўлни босиб ўтгани ҳақида гапирди ҳамда Киевнинг Банкова кўчасидаги машҳур бункерни кўрсатди – Россия ҳужумининг илк ойларида бу ер унинг иш кабинетига айланганди.

«Бугун Путин Киевни эгаллаш учун уч кунлик ҳаракатини бошлаганига роппа-роса тўрт йил бўлди. Бу бизнинг қаршилигимиз, Украина бутун шу вақт давомида қандай курашгани ҳақида кўп нарсани англатади. Ушбу сўзлар ортида миллионлаб одамларимиз, беқиёс жасорат, ақл бовар қилмас даражадаги оғир меҳнат, чидам ва Украина 24 февралдан бери босиб ўтаётган узоқ йўл турибди», – деди президент.

Зеленский урушнинг дастлабки онларида нима қилгани, ўзини қандай тутгани ва ҳамкасблари билан уруш бошлангач ўтказган биринчи телефон қонғироқларини эслади. Унинг айтишича, Банкова кўчасидаги бункерда жойлашган кичик хонадан дунё етакчиларига қўнғироқ қилган, ўша вақтдаги АҚШ президенти Байден эса Зеленскийдан Украинани тарк этишни сўраган.

«Биз бу объектни илгари ҳеч қачон кўрсатмаган эдик – ҳозир у бўш, албатта, лекин уруш бошида бу ерда юзлаб одамлар бор эди… Бу офис – Банкова кўчасидаги бункердаги мана шу кичик хона – уруш бошида дунё етакчилари билан илк суҳбатларимни ўтказган жойимдир. Шу ерда мен президент Байден билан гаплашганман ва айнан шу ерда: „Владимир, хавф бор. Сиз Украинани зудлик билан тарк этишингиз керак. Биз бунга ёрдам беришга тайёрмиз“, деган гапларни эшитганман. Ва айнан шу ерда менга „такси эмас, ўқ-дори кераклиги“ни айтганман», – дея хотирлайди у.

Президент украин халқининг бирдамлиги 4 йилдан бери қаршиликнинг асосий устуни бўлиб келаётганини таъкидлаган.

«Танлов шундай эди. Миллионлаб украиналиклар ўшанда қилган танлов. Халқимиз оқ байроқни кўтармади – улар кўк-сариқ байроқни ҳимоя қилишди. Бу ерда гул кўтарган оломон кутиб олишини ўйлаган босқинчилар эса бунинг ўрнига ҳарбий комиссариатлардаги навбатларни кўришди. Халқимиз қаршиликни танлади. Жангчиларимиз маҳкам турди, тинч аҳоли эса шаҳар ва қишлоқларни, кўча ва ҳовлиларни ҳимоя қилди. Оддий одамлар „тирик девор“ бўлиб, ҳарбий техника колонналарини тўхтатиб қолди ва ҳаммамиз биргаликда йўлини йўқотган Россияга ягона тўғри йўлни кўрсатиб қўйдик», – дейди Украина раҳбари.

У Украинага берилган ҳар бир ёрдам, Россияга қарши санкциялар ортида қаттиқ меҳнат турганини қайд этади.

«Ростини айтсам, баъзида вазият бошқача эди – бу ерда ҳам расмий, ҳам қўпол тил ишлатилган, чунки ҳар бир ёрдам пакети, Россияга қарши ҳар бир санкция, ҳар бир қурол жўнатмаси – буларнинг барчаси учун чинакамига курашиш керак эди. Биз Украинадаги ишонч учун жон-жаҳдимиз билан курашишимиз лозим эди. Биз дунёнинг ростдан ҳам аралашишига ишонч ҳосил қилишни истадик», – дея таъкидлади президент.

Зеленскийга кўра, 2022 йилнинг 24 феврали энг узун кун бўлганди. Шундан сўнг курашаётган томон ушбу аснода ҳафта, ой ва шундай қилиб 4 йилни ўтказди. Украинлар буни унутмайди, бугун ҳалиям рус нефтини бемалол сотиб олаётганлар буни эшитсин, дейди у. Президент фақат мудофаа эмас, Украина қарши ҳужумни ҳам амалга оширганини айтди.

«Украина нафақат бардош берди, нафақат мудофаани ушлаб турди, балки қарши ҳужум ҳам қилди. Бутун шаҳарларимиз тарихга кирди, улар қаҳрамон шаҳарлардир. Балаклия, Изюм, Купянск, Херсон. Босқинчилар Киевдан, Сумидан, Черниҳивдан қандай қувиб чиқарилганини кўрдик. Душманнинг ҳарбий иншоотлари ва нефтни қайта ишлаш заводларининг ёниб кетаётгани тасвирларидан бошқа ҳеч нарса Украина кайфиятини кўтармайди. Бу биринчи марта содир бўлганида – бу катта янгилик эди. Ҳозир эса бу деярли ҳар куни бўлмоқда», – дейди Украина раҳбари.

Зеленскийга кўра, Путин Украинани жанг майдонида мағлуб эта олмаслигини тушунган ва шунинг учун дунёдаги иккинчи армия дейилган рус армияси кўп қаватли уйлар ва электр станциялари билан урушмоқда. Деярли ҳар кечамиз даҳшат, бунга яна ким бардош бера оларди ҳайронман, дейди президент.

«Уруш орасида ҳамма жойда натижага эришиш, ҳар бир ҳужумдан кейин ўзини тиклаш, ҳар сафар ҳаво мудофаасини ракеталар билан тўлдириш, ҳар куни эрталаб ишга бориш, доимий равишда сафда туриш, дунё билан тенг ҳуқуқли равишда гаплашиш. Европа Иттифоқига номзод мақомини олиш, минглаб маҳбусларимизни уйга қайтариш, Давосдан БМТгача бўлган барча халқаро платформаларни украинапараст қилиш, Украинанинг овозини дунёда баландроқ қилиш, «Евровидение»да ғалаба қозониш, «Оскар» ва «БАФТА» мукофотларини олиш, бокс бўйича мутлақ жаҳон чемпиони бўлиш ва украиналиклар энг юқори даражадаги шарафга эга эканликларини исботлаш – бу бемаъни Халқаро Олимпия қўмитасининг ҳар қандай олтинидан анча қимматлироқдир», – деди президент.

Мурожаати давомида Зеленский уруш даврида Украинага келган давлат раҳбарларининг сафарларини ҳам эслади. Улар дўст экани, ҳеч нимадан қўрқмагани, иккиланмагани, Путинни ғазаблантириб қўймаслик ҳақида қайғурмаганини таъкидлади. Мен тарихда ёруғлик томонини танлаган ҳар бир раҳбарга, Украинани танлаганларга раҳмат айтаман, деди у. Зеленский кун келиб ҳозирги АҚШ президенти ҳам Украинага келиши, ҳақиқий азоб нима эканини ўз кўзи билан кўргач, кимга босим ўтказиш кераклигини тушунишидан умидвор эканини қўшимча қилди.

«Бу кўча жанги эмас, бу касал давлатнинг суверен давлатга ҳужуми ва бу уруш Путинники. У унинг бошланиши сабаби ва охирига тўсқинлик қилувчи асосий сабаб», – дея теъкидлади Зеленский.

Сўзи охирида эса президент чиндан ҳам уруш тугашини исташини, лекин Украина тугашига йўл қўймаслигини айтиб ўтди.

«Биз мустақиллигимизни ҳимоя қилдик, давлатчилигимизни йўқотмадик. Украина нафақат харитада бор, балки Украина халқаро муносабатларнинг фаол иштирокчисидир. Пойтахтимиз тик турибди, Харкив, Суми, Черниҳив, Днипро, Запорижжя, Краматорск, Одесса, Лвив ҳам. Бошқа шаҳарлар ҳам. Путин ўз мақсадларига эришмади. У украинларни синдира олмади. У бу урушда ғалаба қозонмади. Биз Украинани сақлаб қолдик ва тинчлик ҳамда адолатни таъминлаш учун ҳамма ишни қиламиз», – дея сўзини якунлади Воломидир Зеленский.