Шаҳрам Ғиёсов профессионал боксда илк бор мағлубиятга учради

Ўзбекистонлик боксчи Шаҳрам Ғиёсов ярим ўрта вазнда (66,7 кг) WBA Regular камари учун жанг ўтказди. 

У Мисрнинг Гиза шаҳридаги Pyramids of Giza аренасида британиялик Жек Каттеролга қарши рингга чиқди. Жанг 12 раунд давом этди ва Жек Каттерол ҳакамларнинг якдил қарори билан ғолиб деб топилди.

Бу Шаҳрам Ғиёсовнинг профессионал боксдаги илк мағлубияти бўлди. У бунга қадар 17та жанг ўтказиб, уларнинг барчасида ғалаба қозонган ва 10та жангда рақибларини нокаутга учратганди. 

Унинг рақиби эса бугунга қадар 34та жанг ўтказган бўлиб, 32 ғалабага эришган, 2та жангда мағлуб бўлган, 14та жангни нокаут билан якунлаган. 

Шаҳрам Ғиёсовнинг сўнгги жанги 2025 йил 12 апрел куни бўлиб ўтганди. Ўшанда ўзбекистонлик боксчи аргентиналик Франко Окампони 4-раундда нокаутга учратганди.