«Нега менга чўпчак гапирасан?» - президент Шайхонтоҳур тумани ИИБ собиқ раҳбарига танбеҳ берди

Шавкат Мирзиёев 27 январ куни Тошкент шаҳридаги жиноятчиликка қарши курашиш билан боғлиқ вазият бўйича ўтказилган йиғилишда профилактика инспекторлари ишининг қандай ташкил этилганини танқид қилди. Жумладан, давлат раҳбари Шайхонтоҳур тумани ИИО ФМБ собиқ бошлиғи, кейинчалик лавозимидан озод этилган Отабек Жамоловни сўроққа тутди.

Президент Шавкат Мирзиёев 27 январ куни Тошкент шаҳридаги жиноятчиликка қарши курашиш билан боғлиқ вазият бўйича ўтказилган йиғилишда профилактика инспекторлари ишининг қандай ташкил этилганини танқид қилди.

Жумладан, давлат раҳбари Шайхонтоҳур тумани ИИО ФМБ собиқ бошлиғи, кейинчалик лавозимидан озод этилган Отабек Жамоловни сўроққа тутди. Суҳбат чоғида президент участка нозирларининг сони ва ИИБ раҳбарияти улар билан қандай тизимли иш олиб бораётгани билан қизиқди. Лавҳа «Ўзбекистон 24» телеканалининг «Менимча» кўрсатувида намойиш этилди.

«Менга ростини айт, ўзим сизларнинг ишингизни билмоқчиман. Ҳафтада неча марта «участкавой»ларни йиғасан, тизимли равишда, ҳудудлар бўйича, омиллар бўйича, жиноятлар бўйича, уларга вазифалар қўйиб, натижаларини сўрайсан?» деб сўради Шавкат Мирзиёев.

Отабек Жамолов душанба кунлари мунтазам ўтказиладиган йиғилишлар, ҳайфсанлар бериш, прокурор ва ҳоким билан биргаликда маҳаллаларни айланиб чиқиш, «маҳалла еттилиги» фаолияти билан танишиш ҳақида тушунтириш берди. Аммо президент бу ишларнинг самарадорлигига шубҳа билдирди.

«Ўзинг шу айтган гапинга ишонасанми? Менга бу гапларни нима қиласан айтиб? «Еттилик» билан нима ишинг бор? Сенинг нима алоқанг бор «еттиликка»? Сен «участковойинг» билан шуғуллан. Нимага менга чўпчак гапларни гапирасан?» деди Мирзиёев.

Отабек Жамолов президентнинг сўзларидан кейин «кўзи очилганини» айтди. Мирзиёев раҳбарият «ерда» ишламаётганини, маҳаллалардаги ҳақиқий аҳволни кўрмаётганини таъкидлади.

«Сен пастга тушмайсан. Муовининг сени алдайди. «Участкавой» алдайди. Сизлар ўзгаришингиз керак. Сизлар ўзгармасангиз вазият ўзгармайди. Бундай «РОВД» бошлиқлари менга керак эмас. Менга баландпарвоз гапларнинг кераги йўқ», деди президент.

Мирзиёевнинг сўзларига кўра, профилактика инспекторлари фаолиятига ёндашувларни ўзгартирмасдан туриб, иқтисодиётда барқарорликка эришиш ва инвестицияларни жалб қилиш мумкин эмас.

«Агар «участковой» дунёқараши ўзгарса, замонавий бўлса, биласизларми, жамият қандай ўзгаради? Тадбиркорлик қай даражада ривожланади? Одамлар биздан қанчалик рози бўлади?» деди у.

«Барибир ўзгартиришга мажбур қиламан сизларни. Қўймайман ҳеч қайсингни. Биронтангни ухлатмайман. Нима учун буни қиляпман? Энди бизга катта-катта инвесторлар керак. Энди келиб иш бошлаяпти катта инвесторлар. Агар инвестор келмаса, даромадимиз ошмайди, ойликлар кўпаймайди, одамлар норози бўлади», деди президент.

У маҳаллаларда жиноятга йўл қўйиб бўлмаслигини таъкидлади.

«Битта жиноят ҳам жиноят. У ҳам йўқ бўлиши керак маҳаллада. Бу нима учун керак? Одамларимизнинг иқтисодиётини барқарор бўлишига ишонтириш учун керак. Иқтисодиёт қачон барқарор бўлади? Жиноятчиликни жиловласак», деди давлат раҳбари.

Шавкат Мирзиёев томонидан 27 январда ўтказган танқидий руҳдаги йиғилишдан сўнг ҳуқуқ-тартибот идоралари тизимида тайинлашлар ва ишдан бўшатишлар амалга оширилди. Жумладан, Отабек Жамолов ҳам ишдан олинди.