Туркияда ўзбекистонлик аёлга ҳужум қилинди: икки эркак ушланди

Маълум қилинишича, воқеа Бодрумнинг Яликавак туманидаги Гўкчебел маҳалласида содир бўлган. Жабрланувчи аёл йўл четида транспорт кутиб турган вақтда, икки нафар эркак бўлган автомобил тўхтаб, уни Туркбуку ҳудудига олиб боришни таклиф қилган.

Йўл давомида ҳайдовчи йўналишни ўзгартириб, аёлни қурилиш объектига олиб борган. Жабрланувчининг айтишича, у ерда эркаклар томонидан куч ишлатиш таҳдиди остида жиноят содир этилган.

Шундан сўнг гумонланувчилар аёлнинг сумкаси, пул маблағлари ва мобил телефонини олиб, воқеа жойидан яширинган.

Оғир ҳолатига қарамай, жабрланувчи яқин атрофдаги уйларга етиб бориб, маҳаллий аҳолидан ёрдам сўраган. У шифохонага ётқизилиб, тиббий ва психологик ёрдам кўрсатилмоқда.

Ҳуқуқни муҳофаза қилувчи органлар томонидан олиб борилган тезкор тадбирлар натижасида гумонланувчилар — 24 ва 25 ёшли икки нафар эркак аниқланиб, қўлга олинган. Суд қарори билан улар қамоққа олинди.

Мазкур иш маҳаллий ҳуқуқни ҳимоя қилувчи ташкилотлар назоратида бўлиб, тергов ҳаракатлари давом этмоқда.