Франциядаги қотиллик: полиция тепкини эгизаклардан қайси бири босганини тополмаяпти

33 ёшли ака-укалар ҳамда Франциянинг яна уч фуқаросига икки марта қотиллик ҳамда яна бир неча бор қотилликка уриниш ҳолатлари юзасидан айблов қўйилган. Гап 2020 йил сентябрида содир бўлган воқеалар ҳақида кетмоқда.

Прокурорлар тахминига кўра, айбланувчилар Парижнинг чекка ҳудудларида фаолият олиб борувчи жиноий тўда аъзолари ҳисобланади.

Ҳар икки ака-ука жиноятларга алоқадорликда гумонланмоқда, аммо асосий саволлардан бири – ҳужумлардан бирида фойдаланилган автоматда айнан кимнинг генетик материали аниқлангани – очиқ қолмоқда.

Полиция ходими судда экспертлар улардан қайси бири тепкини босганини барибир топа олмаганини айтди. «Уларни фақат онаси фарқлаши мумкин», – деган терговчилардан бири судда.

Хабар қилишларича, суд залидаги муҳит ўта асабий бўлган. Пайшанба куни эгизаклар ўрнидан туришдан бош тортгани учун суд залидан олиб кетилган.

Полиция ака-укалар ўзларининг ўхшашлигидан фойдаланиб, содир этган жиноятлари изларини яширишганини таъкидлаган. Le Parisien полициячилардан бирига асосланиб ёзишича, улар тез-тез кийимлари, телефонлари ва ҳужжатларини алмашиб туришган.

Бу каби бир хил эгизаклар битта уруғланган тухум ҳужайранинг бўлинишидан, бир-бирига ўхшаш ва жинси бир хил бўлиб туғилади. Уларнинг ДНКси мутлақо бир хил, шунинг учун мутахассислар қуролдан айнан кимнинг генетик материали топилганини аниқлай олмайди.

Энди терговчилар телефон суҳбатлари, ташқи кузатув камералари ва эшитиш материаллари орқали ака-укалардан қайси бири отишмада айбдорлигини аниқлашга ҳаракат қилмоқда.

Суд ушбу иш бўйича феврал ойи охирида қарор чиқариши кутилмоқда.

Бир хил, аммо бутунлай эмас

Шу билан бирга, замонавий технологиялар баъзи ҳолларда бир хил эгизакларнинг ҳам генетик намуналарини фарқлаш имконини беради.

Guardian газетаси ёзишича, 2025 йил августида АҚШда эгизаклардан бирига илк бор ДНК таҳлили асосида ҳукм ўқилган. Ҳакамлар ўшанда 1987 йилда содир этилган жинсий зўравонлик учун 54 ёшли Рассел Маррубиони айбдор деб топишганди.

Ўшанда тергов пайтида топилган ДНК икки эгизак ака-укага тегишли экани маълум бўлган ва жиноятни фош этишга уринишлар тўхтатилганди.

Аммо қарийб 40 йил ўтганидан кейин олимлар тухум ҳужайра бўлинганидан кейин содир бўлган баъзи ноёб мутацияларни аниқлашга муваффақ бўлишди.

«Эгизакларда ўртача 3 млрд геномга тўғри келадиган саккизта шундай фарқ бор», – дея ДНК тадқиқотлари билан шуғулланувчи Parabon компанияси вакили Элен Грейтакнинг сўзларини келтиради нашр.

Натижада экспертлар ушбу майда мутацияларнинг баъзиларини аниқлашга муваффақ бўлишади ва ака-укалардан бири айбдор деб топилади.

Бир хил эгизаклар иштирокидаги бошқа ишлар

1999 йил, АҚШ. Мичиганда талаба қиз зўрланиши

Рэпид-Фоллс шаҳарчасида бир қиз ҳужумга учраган: у бошига қаттиқ зарба қабул қилган ва зўрланган. Фақат беш йил ўтиб ДНК орқали гумонланувчига етиб борилган, аммо унинг эгизаги борлиги маълум бўлган.

Сўроқ вақтида Жером Купер ва Тайлер Купер иқрор бўлмаган, шу билан бирга, бир-бирини ҳам айбламаган. «Биз уларни ўзаро суҳбат вақтида ўзини фош қилишидан умид қилиб, бир хонага қамаб қўйдик – аммо йўқ, улар шунчаки бемаъни мавзуларда гаплашиб ўтиришди», – дея ҳикоя қилади полиция капитани Жеффри Ҳертел.

Уч марта айблов эълон қилинган. Суд охирги бор бу ишга 2018 йилда мурожаат қилган. Иш очилмасдан қолган – тўлиқ ДНК экспертизаси жуда қиммат бўлиб чиққан.

2009 йил, Малайзия. Гиёҳвандлик моддалари партияси тўхтатилиши

Куала-Лумпур полицияси 166 кг марихуана ва 1,7 кг опий хомашёсини олиб кетаётган автомобилни тўхтатади. Гиёҳванд моддалар олиб кетилаётган уйга пистирма қўйилганди, лекин полиция қўлга олган шахс ҳайдовчининг эгизаги бўлиб чиқади.

Малайзияда 2018 йилгача наркокурерларга ўлим жазоси қўлланган. Суд жараёнида ака-ука Сатис Раж ёки Сабариш Раждан қайси бири қоплардаги нарсаларни аниқ билгани ва ташишни ташкил қилгани бўйича шубҳа пайдо бўлади. «Мен бегуноҳ одамни дор остига юборолмайман», – дейди судя ва иккаласини ҳам озод қилишга қарор қилади.

2009 йил, Германия. Заргарлик бўлимидаги 6 млн евролик тақинчоқлар ўғирланиши

25 январ куни эрта тонгда ниқоб таққан уч нафар босқинчи Берлиндаги ҳашаматли KaDeWe (Kaufhaus des Westens) универмагига арқон нарвон орқали чиқиб, 6 млн евролик қимматбаҳо буюмларни ўғирлаган. Жиноят жойида қўлқоп тушиб қолган.

Қўлқоп ичидаги бармоқ излари ва ДНК асосида полиция гумонланувчини аниқлайди, аммо унинг бир хил эгизаги бор эди. Уларнинг иккиси ҳам – Ҳассан ва Аббос О. ҳибсга олинади. Бироқ экспертлар қўлқоп айнан кимга тегишли эканини аниқлай олмайди ва ака-укалар айблов эълон қилинмай ва судга тортилмай, озодликка чиқарилади.