Трамп Макрон ва унинг рафиқасини масхара қилди. Франция етакчиси жавоб қайтарди

1 апрел куни Вашингтонда диний етакчилар ва ҳукумат арбоблари иштирокида ўтган тушликда АҚШ етакчиси НАТОдаги иттифоқчиларини Эрон билан урушга қўшилмагани учун қаттиқ танқид қилди. Шунингдек, Доналд Трамп французча талаффузга тақлид қилиб, Эммануэл Макрон ва унинг рафиқаси Брижит Макронни масхара қилди.

Трамп нималар деди?

The Guardian'нинг ёзишича, Оқ уйнинг YouTube каналига юкланган ушбу видео қисқа вақтдан сўнг ўчириб ташланган. Аммо рақамли замонда бу видео аллақачон тармоқларда вирус каби тарқалиб бўлганди.

Trump mocks Macron again:

I called up France, Macron, whose wife treats him extremely badly and he’s still recovering from the right to the jaw. pic.twitter.com/bEJgfKaVRg

— Clash Report (@clashreport) April 1, 2026

«Мен Францияга, Макронга қўнғироқ қиламан – унинг рафиқаси унга ўта ёмон муомалада бўлади. [У] ҳали ҳам жағига тушган ўнг зарбадан ўзига келгани йўқ», деди у.

Трамп бу орқали 2025 йил май ойида тарқалган видеони назарда тутди. Ўшанда Макрон Ветнамга расмий ташриф билан самолётдан тушишга тайёргарлик кўраётганида Брижит хоним турмуш ўртоғини юзидан итариб юборгани акс этган видео тарқалганди.

Кейинроқ Макрон рафиқаси билан ҳеч қандай «оилавий низо» бўлмаганини айтиб, буни «биз тез-тез қиладиган ҳазил» деб тушунтирган.

Тушликда Трамп сўзида давом этди: «Мен айтдим: Эммануэл, биз ёмон одамларни йўқ қилиш ва баллистик ракеталарни уриб тушириш бўйича рекордлар ўрнатаётган бўлсак ҳам, кўрфазда ёрдам беришингизни истардик. Бизга ёрдам керак. Агар иложи бўлса, илтимос, зудлик билан кемаларингизни юборинг».

Кейин Трамп Макроннинг тахминий жавобига французча талаффуз билан тақлид қилишга уринди: «'йўқ, йўқ, биз буни қила олмаймиз, Доналд. Буни уруш ғалаба билан тугаганидан кейин қилишимиз мумкинʼ», деди у. «Мен айтдим: йўқ, йўқ, менга уруш тугаганидан кейин кераги йўқ, Эммануэл», деди Трамп.

«Шундай қилиб, мен НАТО ҳақида билиб олдим: агар қачонлардир 'катта тўқнашувʼ содир бўлса, НАТО у ерда бўлмайди. 'Катта тўқнашувʼ деганда нимани назарда тутаётганимни тушунасиз», дея қўшимча қилди Трамп батафсил тўхталиб ўтирмасдан.

Макрон қандай жавоб қайтарди?

Эрон уруши ҳар куни ўзгариб турмайдиган «жиддий» ёндашувни талаб қилади, деди Эммануэл Макрон Трампнинг ушбу можарога оид бир-бирига зид кўринадиган фикрларига очиқдан очиқ ишора қилиб.

«Бу шунчаки шоу эмас. Биз уруш ва тинчлик, эркаклар ва аёлларнинг ҳаёти ҳақида гапиряпмиз», деди Франция президенти Жанубий Кореяга давлат ташрифи билан келганида.

«Агар жиддий бўлишни истасангиз, ҳар куни – бир кун олдин айтган гапингизнинг тескарисини айтмайсиз. Ва эҳтимол, ҳар куни гапириш ҳам керак эмасдир. Шунчаки вазият тинчишига қўйиб бериш керак», дея Макроннинг сўзларини келтирмоқда BBC нашри.

Макрон ҳозирда иккинчи ойига қадам қўйган АҚШ–Исроилнинг Эрондаги уруши ҳақидаги саволларга жавоб бераркан, Трампнинг НАТО ҳақидаги фикрларига ҳам тўхталиб ўтди.

«НАТО каби иттифоқлар айтилмаган нарсалар — яъни уларнинг ортидаги ишонч туфайли қадрлидир. Ҳамкорлар битимлар имзолайди ва муаммолар юзага келганида иштирок этади, «уларга амал қилиш ёки қилмаслик ҳақида ҳар куни изоҳ бериш ўрнига. Менимча, қуруқ гаплар, чалкашликлар жуда кўп», деди у.

Макрон АҚШ ва Исроил «ўзлари мустақил қарор қилган» операция бўйича изоҳ беришни истамаслигини қўшимча қилди. «Кейин эса улар ўзлари ёлғиз қарор қилган операцияда ёлғиз қолиб кетганларидан нолийдилар. Бу бизнинг операциямиз эмас», деди Макрон.

Макрон, шунингдек, 2025 йил июн ойида АҚШнинг Эронга берган зарбаларини эслатиб ўтди: ўшанда Трамп Эрон ядровий иншоотлари «яксон қилинганини» айтган эди.

«Бугун ҳам, келажакда ҳам тажрибага эга одамлар, яширин лабораториялар ва ҳоказолар бўлади. Шундай экан, бир неча ҳафта давом этадиган нишонли ҳарбий ҳаракатлар ядровий муаммони бутунлай ҳал қила олмайди», деди Макрон.

Трампнинг Франция етакчиси ва унинг аёлини масхара қилгани ҳақида Макрон бу гапларни «на нафис, на муносиб» деб рад этди. «Мен уларга жавоб бермайман, улар жавобга лойиқ эмас», деди у.

Шунингдек, Макрон Ҳўрмуз бўғозини қайта очиш учун ҳарбий операция ўтказиш ғоясига қарши чиқиб, буни «ҳақиқатдан йироқ» деб атади. Чунки бу жуда узоқ вақт талаб қилади ва ўта хавфлидир.

Францияда Трампнинг гаплари жуда салбий қабул қилинди

Макроннинг оиласи ҳақидаги гаплар Францияда ўта салбий қабул қилинди, ҳатто Макроннинг ашаддий танқидчилари ҳам уни ҳимоя қилиб чиқди. «Доналд Трампнинг у билан бундай гаплашиши ва рафиқаси ҳақида бундай тарзда сўзлашини мутлақо қабул қилиб бўлмас деб ҳисоблайман», деди «Бўйсунмас Франция» партиясидан Мануэл Бомпар.

«Биз ҳозирда дунё келажагини муҳокама қиляпмиз. Айни дамда Эронда содир бўлаётган воқеалар миллионлаб одамларнинг ҳаётига таъсир қиляпти, жанг майдонида одамлар ўляпти. Бизда эса кулаётган, бошқаларни масхара қилаётган президент бор», деди Франция парламентининг қуйи палатаси марказчи президенти Яел Браун-Пиве.