Украинада янги коррупцион можаро. Нишонда – Тимошенко

Украинада навбатдаги коррупцион можаро авж олди. Ўтган йил охирида Тимур Миндич марказида бўлган йирик коррупцион можарони очган Украина Коррупцияга қарши курашиш миллий бюроси НАБУ ва Коррупцияга қарши курашга ихтисослашган прокуратура САП мамлакатдаги энг машҳур сиёсатчилардан бири Юлия Тимошенкони нишонга олди.

Зеленскийгача мустақил Украина тарихидаги энг машҳур сиёсатчи сифатида қаралган Тимошенко хоним депутатларни сотиб олишда айбланмоқда. Украинада бунақа ноодатий сиёсатчини тополмайсиз: ўтган асрда партия очган, янги асрда икки марта бош вазир бўлган, етмаганига икки марталаб қамалиб чиққан...

«Кассага бераётгандек бераман»

НАБУ Юлия Тимошенкони депутатларни сотиб олишга уринишда айбламоқда. Ташкилот расмий баёнотида гумонланувчи Тимошенко экани айтилмаган, лекин эълон қилинган видеодаги юзи хиралаштирилган аёл айнан «Баткившина» партияси раҳбари Юлия Тимошенко экани унинг машҳур соч турмагидан билинган. Сиёсатчи Рададаги мажлисда айбловларни сиёсий пиар деб чиқди ва тўрт ўрам 100 долларлик купюра билан қўлга олинган гумондор у эканига шубҳа қолдирмади.

НАБУ'га кўра, Тимошенко депутатларни, хусусан, ўз фракциясияга кирмайдиган бошқа партия депутатларини сотиб олишга уринган. Ташкилот бу борада Тимошенконинг овози ёзиб олинган аудио ҳам эълон қилди. Бир неча дақиқалик аудионинг ўзи коррупция ҳолати борлигини кўрсатиб қўйган. Унда Тимошенко экани айтилаётган аёл депутатларга қайсидир қонун лойиҳаларини қўллаш учун пул таклиф қилган.

Аудиодаги аёл «иккита сессия учун 10 тўлаймиз», деган. Гап катта эҳтимол 10 минг доллар ҳақида кетмоқда. Чунки видеода ҳам гумондор аёл тўрт ўрам 100 долларлик билан қўлга олинган. «Сиз билан келишиб олсак, ким ким билан бирга эканини белгилаб оламиз ва мен сизга бераман. Кассага бераётгандек бераман», деган аёл.

Аудиоларда Тимошенко депутатларни Васил Малюк, Михаил Фёдоров ва Денис Шмигал истеъфога чиқиши борасида қонун лойиҳасини қўллаб, уларни янги лавозимга тайинлаш бўйича лойиҳани рад этишга чақирган. Нега бундай деганини тушуниш қийин эмас. Тимошенко шу орқали президент Зеленский ўзи асосчиси бўлган «Слуга народа» партияси орқали қонун қабул қилишига халақит беришга, яъни Зеленскийни парламентдаги кўпчилик устунлигидан маҳрум қилишга уринган. Афтидан, Тимошенко хонимнинг бу трюки ўхшаган кўринади, Рада чиндан юқоридаги мулозимларни бир уринишда янги лавозимга тайинлай олмади.

Бу нима дегани?

Энди бу коррупцион можаро нимани англатиши ҳақида. Тимошенко хоним НАБУни пиар ташкилот деб атаб, ўзига нисбатан айбловларни сиёсийлашган деб атади. Унинг шаъма қилишича, мамлакатда сайлов яқин ва Зеленский ўзининг сиёсий рақибларини йўлдан олишни бошлаган. Лекин Тимошенко хоним ошириб юборди, менимча. Хонимнинг охирги йиллардаги сиёсий мақоми инобатга олинса, уни Зеленский учун сиёсий рақиб деб бўлмайди. Украинада уруш бошлангач, сиёсий элита буткул ўзгарди. Қайсидир олигарх билан яқин алоқада бўлган минг йиллик сиёсий динозаврлар ортиқ Украинада сиёсий элита эмас. Уруш давридаги Украинада Буданов, Залужний, Малюк, Сирский ва бошқа ҳарбийлар сиёсий элита. Уруш Украина элитаси тушунчасини қиммат яхталардан окопга олиб тушди.

Бу ҳолатга НАБУ ўз ишини тўғри бажаряпти деб баҳо бериш мумкин. Бу ташкилот олдинроқ президент Зеленскийнинг дўсти Тимур Миндич марказида бўлган уруш давридаги энг жиддий коррупцион можарони очганди. Ўшанда НАБУ Зеленскийга қарши ишлаётгандек кўринганди, чунки у ҳеч қачон Миндич иши очилгандаги каби истеъфога яқин келмаганди. Лекин ҳозир НАБУ энди Зеленский фойдасига ишлаётгандек таассурот уйғотмоқда. Чунки Тимошенко жуда кичик бўлса ҳам, барибир Зеленскийнинг сиёсий рақибларидан бири.

Украина жамияти бу эпизодда бир нарсага хурсанд бўлса арзийди. Мамлакат бешинчи йил кучли қўшнисига қарши урушаётган бўлса-да, унда НАБУ каби коррупцияга қарши тизим жуда яхши ишламоқда. Жамиятда борган сари коррупцияга тоқатсизлик ошмоқда. Демократик институтлар уруш даврида ҳам ишлаяпти. Кўз ўнгимизда узоқ йиллар Европадаги энг коррупциялашган давлатлар сирасига кирган мамлакатда уруш даврида коррупцияга қарши кураш кечмоқда. Бунинг натижасини украинлар албатта кўради...