Ҳатто кўтариб юрса бўлади — автомобил саноатидаги ноодатий 8 машина (фотожамланма) 

Автомобилларни серияли ишлаб чиқариш бошлангандан бери ушбу саноат деярли ҳар 10 йилликда катта ўзгаришларни бошидан ўтказиб келади. Маълум бир давр моделлари қайсидир жиҳатдан бир-бирига ўхшайди. Масалан, ташқи томони, техник хусусиятлари, имкониятлари ва қайсидир жиҳатларнинг етишмаслиги тарафидан ҳам бир-бирини қайсидир нуқталарда такрорлайди. Қуйида ўзининг ноодатийлиги, бир қарашда ғалатилиги билан ажралиб турган автомобиллар ҳақида ҳикоя қилинади.

BMW Isetta 300

Isetta BMW компаниясини вақтида банкротликдан қутқариб қолган. Рақобатчи компаниялар кўпроқ қиммат машиналар чиқариш билан банд бўлиб турган вақтда БМW арзонроқ сегментга эътибор қаратиб, Isetta’ни сотувга чиқаради. Кўримсизгина модел 1956—1962 йилларда 161 минг 728 дона ишлаб чиқарилган. Двигател ҳажми атиги 0,3 литр бўлиб, 13 от кучини берган. Машинада атиги битта эшик бўлиб, у ҳам бўлса кузовнинг олд қисмида эди ва рул билан бирга қўшилиб очиларди. Унга 2 киши ўтириши мумкин эди. Максимал тезлиги соатига 85 км бўлган, холос. 

Mohs Ostentatienne Opera Sedan 

Mohs компанияси хўжайини Брюс Моҳс ушбу моделни аслида ҳақиқий люкс сегментидаги седан қандай бўлиши кераклигини бошқаларга кўрсатиш, билдириш мақсадида яратади. Шу боисдан ҳам ишлар концептни яратишдан нарига ўтмаган. Модел 1967—1979 йилларда 6-7 нусхада ишлаб чиқарилади, холос. Двигател ҳажми 5 литр бўлиб, 193 от кучига эга бўлган. Унга 5 киши ўтириши мумкин эди. Унинг асосий ўзига хослиги — эшикларнинг йўқлиги эди. Машина ичига фақат юқорига очиладиган орқа багаж орқали кириш мумкин эди. Очилган вақтда пастга қизил материал билан қопланган зина ҳайдовчи ва йўловчини кутиб олади. 

Axiam-Mega MultiTruck 

Француз компанияси Axiam-Mega аввал бошдан ихчам автомобиллар ҳамда квадроцикллар ишлаб чиқаришга ихтисослашган бўлган. Бироқ 2010 йилга келиб автоконцерн машина сақлаш ҳамда кичик гуруҳларни ташиш харажатларини камайтириш истагида бўлганлар учун енгил юк ташувчи — MultiTruck’ни ишлаб чиқаришни йўлга қўйди. Ҳақиқатан, машина тежамкорлиги билан бирга кўринишидан жуда ғалати эди. 

Mazda R360 

R360 — Mazda компанияси томонидан серияли ишлаб чиқарилган биринчи модел. 1960—1966 йилларда 65 минг дона ишлаб чиқарилган. Двигател ҳажми 0,35 литр бўлиб, 16 от кучини берган. Машина автомат узатмалар қутиси ёки механик узатмали кўринишида тақдим этилган. Вазни эса 380 кг тош босган. Салонига 4 кишини сиғдира олган. Максимал тезлиги соатига 80 км бўлган. Модел орқали Mаzda ўзининг молиявий имкониятини анча яхшилаб олган. Иккинчи жаҳон урушидан кейин япон маҳсулотлари экспортига чеклов қўйилганди. Ушбу чеклов бекор қилинганидан кейин R360 модели нафақат маҳаллий бозорда, балки хориж бозорларида ҳам яхши сотилган. 

Russo-Baltique Impression 

2002 йилда А:Level ателеси русларнинг таниқли “Руссо-Балт” маркасини қайта тиклашга қарор қилади. “Руссо-Балт” савдо белгиси соҳиби Виктор Такнов ушбу лойиҳага 2 млн доллар сармоя қилади. Ателе эса ўз номини Russo-Baltique’га ўзгартиради. Russo-Baltique Impression’нинг ягона нусхаси 2006 йилда тақдим этилади. У немис компанияси German GErg GmbH билан ҳамкорликда яратилади ва Женевадаги автокўргазмада оммага намойиш этилади. Машина ташқи кўриниши билан ХХ аср 40-йилларидаги моделларни эслатиб юборарди. 

Daihatsu Midget II 

Японларнинг ушбу модели ишлаб чиқарилган биринчи йилда 80 минг нусхада сотилган. Бироқ у омадли моделлар қаторида турмайди. У захира ғилдираги кузовнинг олд қисмида жойлашгани ва бу билан каркидонни эслатиб юбориши билан ажралиб турган. 1993 йилда Токиодаги автокўргазмада тақдим этилади, бироқ серияли ишлаб чиқариш орадан 3 йил ўтиб бошланади. Жиҳозланишидан келиб чиқиб, 2 ўриндиқли ёки фақат ҳайдовчи учун мўлжалланган позицияларда харидорларга таклиф этилган. Двигател ҳажми 0,65 литрга тенг бўлиб, 30,5 та от кучини берган. Максимал тезлиги соатига 50 кмни ташкил қилган, холос. 

Peel P50 

Буюк Британия автомобилсозларидан ғалати ихтиро — Peel P50. Бир эшикли ва биргина ҳайдовчи учун ўриндиқ. Вазни бўлса атиги 59 кг. 4,2 от кучига эга машина 100 кмга бор-йўғи 2,8 литр бензин сарф қилган. Максимал тезлиги эса соатига 61 кмга етиши мумкин эди. 2010 йилда Peel компанияси P50 нинг электрда ҳаракатланадиган моделини чекланган миқдорда ишлаб чиқарди. 

Twike 

Twike Германия ва Швейцария автомобилсозлари томонидан ҳамкорликда яратилган. Уни гибрид деб аташ мумкин. Боиси у электрдан ташқари одам ёрдамида ҳам ҳаракатланиши мумкин эди. Машина салонига ўрнатилган педал орқали 246 килограммли машинани ҳайдовчи бемалол ҳаракатлантириши мумкин. Ишлаб чиқарувчиларга кўра, машинани ҳаракатлантириш давомида ҳайдовчи жисмоний машқ бажаргандек бўлади ва яхшигина қизиб олади, шу боисдан ушбу моделга иситиш тизимининг кераги йўқ. 2 кишини ўз бағрига сиғдира оладиган Twike соатига 85 км тезлик билан ҳаракатланиш имкониятига эга. Ўрнатилган батареяларидан келиб чиқиб, тўла қувват билан 50 дан 300 кмгача масофани босиб ўтиш мумкин.