Қўшимча функционаллар
-
Тунги кўриниш
Туркияда канани ёқишга уринган эркак ўрмонга ўт қўйиб юборди
Ёнғин оқибатида 12 гектар майдонда қишлоқ хўжалиги ва ўрмон ерлари ёниб кетди. Суд гумонланувчини ҳибсга олиш бўйича қарор чиқарди.
Фото: tgrthaber.com
Туркиянинг Маниса провинцияси суди қарори билан канани ўлдиришга уриниб, 12 гектар майдонда ўрмон ёнғинларини келтириб чиқарган эркак ҳибсга олинди.
Туркияда ўрмон ёнғинлари давом этмоқда. Беш кун ичида мамлакатда 340 дан ортиқ ёнғин ўчоқлари қайд этилди.
«Манисадаги ёнғин 12 гектар майдонда қишлоқ хўжалиги ва ўрмон ерларини йўқ қилди. Жандармерия ёнғин сабабларини тергов қилиш вақтида Озжан Ташхан исмли фуқарони қўлга олди ва ёнғин унинг айби билан юзага келганини аниқлади», — дейилади хабарда.
Таъкидланишича, сўроқ вақтида Ташхан кана чиққан ёстиқни ёққан ва уни боғга улоқтириб юборган. Суд Ташханни ҳибсга олиш бўйича қарор чиқарди.
Қайд этилишича, Туркиянинг шимолий провинциялари ҳар йили каналар босқинидан азият чекади, аммо бу йил жазирама сабаб Истанбул ва Анталяда ҳам каналар пайдо бўлган.
Сивас провинциясида йил бошидан бери ўн киши кана чақиши оқибатида юзага келган Конго-Қрим геморрагик безгаги оқибатида вафот этган.
