2026 йилдан кўп қаватли уйга қўшимча қават қўшиш учун лойиҳани қайта расмийлаштириш тақиқланади

“Бино ва иншоотларнинг зилзилабардошлиги ва сейсмик хавфсизлигини таъминлашда давлат назорати ва бошқарувини янада такомиллаштириш чора-тадбирлари тўғрисида”ги президент фармонига мувофиқ, 2026 йил 1 январдан бир қатор янги тартиблар жорий этилади.

Фармонга кўра:

• миллий норматив ҳужжатларга номутаносиб бўлган қисмлар учун компенсацияловчи чоралар асосида ишлаб чиқилган лойиҳа ҳужжатларининг экспертизаси фақат “Шаҳарсозлик ҳужжатларини экспертиза қилиш республика маркази” давлат муассасаси томонидан амалга оширилади;
• объектларнинг зилзилабардошлиги бўйича илмий ҳамда лойиҳа ҳужжатларининг смета қисмидан ташқари шаҳарсозлик ҳужжатлари экспертизаси хулосаларини тавсиявий тарзда бериш амалиёти тугатилади, улар қарор қабул қилиш учун мажбурий аҳамият касб этади;
• объектларнинг зилзилабардошлиги бўйича берилган салбий хулоса лойиҳа ташкилотининг “Шаффоф қурилиш” миллий ахборот тизимидаги рейтинг балларини камайтиришга асос бўлади.

Энг муҳим ўзгаришлардан бирига кўра, қурилиши бошланган кўп квартирали уй-жойларга қўшимча қават қўшиш ёки баландлигини ошириш мақсадида шаҳарсозлик ҳужжатларини ишлаб чиқиш, тегишли архитектура-шаҳарсозлик кенгашларида кўриб чиқиш, экспертизадан ва қайта рўйхатдан ўтказиш тақиқланади.

Шунингдек, Қурилиш ва уй-жой коммунал хўжалиги вазирлиги томонидан ноқонуний қурилмаларни буздириш ишлари нархлари ҳар бир йил учун алоҳида белгилаб борилиши кўзда тутилган.

Ушбу чора-тадбирлар қурилиш соҳасида интизомни кучайтириш, зилзила хавфи юқори бўлган ҳудудларда аҳоли хавфсизлигини таъминлаш ва ноқонуний қурилишлар билан кескин курашишга қаратилган.