Зеленский Россиянинг 2026–2027 йиллар учун ҳужум режаларини очиқлади

Володимир Зеленскийнинг сўзларига кўра, 2026–2027 йилларда РФ Қуролли кучлари Донецк ва Луҳанск вилоятларини тўлиқ босиб олишга эришишни, Запорижжя вилоятида олдинга силжишни, шунингдек Днипро шаҳри ва Одесса вилояти йўналишида ҳаракатланишни кўзламоқда.

Фото: Telegram / V_Zelenskiy_official

Украина ҳокимияти РФ Қуролли кучларининг 2026–2027 йилларга мўлжалланган ҳужум режаларини қўлга киритган, деди президент Володимир Зеленский журналистлар билан 2 март, душанба куни мулоқотда. Унинг айтишича, Москва учун мақсад ўзгармаган: Украинанинг Донецк ва Луҳанск вилоятларини тўлиқ оккупация қилиш, шунингдек Запорижжя вилоятида олдинга илгарилаш, Днипро шаҳри ҳамда Одесса вилояти йўналишида ҳаракатланиш.

Зеленскийнинг баҳосига кўра, Россияда бу мақсадларга эришиш учун етарли куч йўқ. Унинг сўзларига кўра, РФ армияси олдига 2025 йил учун қўйилган вазифалар бажарилмаган.

«Биз 2025–2026–2027 йилларга оид ҳужжатлар, режаларни қўлга киритдик, 2025 йил бўйича бироз эскирган. Кўряпмизки, улар ўз мақсадларини бажармади. Биз 2026–2027 йиллар бўйича ҳам (режаларни — таҳр.) олдик. Нима исташларини тушуняпмиз. Уларнинг йўналишлари ҳали ҳам долзарб эканини биламиз — давлатимизнинг шарқини, аниқроғи Донецк ва Луҳанск вилоятларини оккупация қилиш», — деди Зеленский. «Улар, шубҳасиз, Запорижжя вилояти йўналишида ҳам, Днипро йўналишида ҳам давом этмоқчи. Улар учун бу қийин, аммо Одесса минтақаcига ҳам кўз ташлашяпти. Биз бу йўналишларни кўряпмиз. Лекин бу хариталар ҳозирча реалликка ҳеч қандай алоқаси йўқ, чунки улар вазифаларни бажара олмаяпти».

Украина президенти аниқлаштиришича, РФ Қуролли кучлари 2026 йил баҳорига режалаштирган ҳужум 2025 йил охирига мўлжалланган мақсадларга эришишга боғлиқ бўлган. Натижада «улар март ойидаги ҳужумни — айнан ўзи истаган ҳужумни — бошлай олмаяпти», дея таъкидлади Зеленский.

«Мен баҳорда ҳужум бўладими-йўқми ва айнан қачон бўлишини билмайман. Улар ҳужум қилишни хоҳлайди, лекин ҳозирча бунга кучи етмайди. Ҳаммаси контрактларга, ҳужумларга, қурол-яроғга, бизга қурол етказиб беришга, шунингдек ўз ишлаб чиқаришимизга боғлиқ», — дея президент сўзларини келтирган “РБК-Украина” нашри.

24-канал маълумотига кўра, Зеленский шундай деган: Украина разведкаси маълумотларига кўра, Владимир Путин РФда ҳозирча умумий (ялпи) сафарбарликни режалаштирмаяпти.

24 феврал куни Украина президенти офис раҳбарининг ўринбосари Павел Палиса “Биз — Украина” нашрига берган интервюсида, унинг маълумотларига кўра, россияликлар март ойи охиригача Украинанинг бутун Донецк вилоятини оккупация қилишни исташини айтган.

«Шунингдек (Россия режалаштираётгани — таҳр.) — Запорижжя ва Днипропетровск вилоятларида имкони борича максимал даражада олдинга силжиш. Қолаверса, Суми ва Харкив вилоятларидаги чегара бўйлаб буфер зона яратиш ниятидан ҳам қайтмаган. Агар муваффақиятга эришса, йил охиригача душман Запорижжя, Херсон, Миколайивни эгаллаш ёки уларни эгаллаш учун шароит яратиш, кейин эса Одессагача давом этиш учун ҳужумни ривожлантиришга уринади. Мен ҳозирча рақибнинг бу режаларни яқин олти ой ичида амалга ошириш имкониятини кўрмаяпман», — деган эди ўшанда Палиса.