Ўзбекистон ҳудудига совуқ антициклон кириб келади

Бугун Ўзбекистон ҳудудига Эрондан илиқ ва нам ҳаво массалари кириб келиши бошланди. Аксарият вилоятларда ёмғир ёғади. Республиканинг шимолий ва жануби-шарқий ҳудудларида ёғингарчиликсиз об-ҳаво сақланиб туради.

Фото: KUN.UZ

«Ўзгидромет» хабарига кўра, ҳаво ҳарорати декабрь ойининг охиридаги ўртача кўп йиллик қийматларга яқинлашади ва 7-10 даража илиқни ташкил этади.

Бироқ, эртага республика ҳудудларига жанубий циклон кириши бошланади, сўнгра Урал ҳудудларидан совуқ антициклон кириб келади. Республика бўйича ёмғир ёғади, кечга томон қорга айланиши мумкин, фақат республика шимолида ва шимолий ҳудудларнинг чеккасида ёғингарчилик кутилмайди

Якшанба куни ёғингарчилик бўлади, у совуқ фонда қор кўринишида давом этади. Республиканинг тоғли ҳудудларида баъзи жойларда кучли қор ёғиши мумкин, қор кўчиши хавфи сақланиб туради.

Дам олиш кунлари ҳарорат пасаяди ва якшанба куни 3 даража совуқ - 2 даража илиқ атрофида бўлади. Бу даврда кечаси ва эрталаб республика бўйича баъзи жойларга туман тушиши мумкин.

Бугун ва эртага республиканинг айрим ҳудудларида шамол 15-20 м/с гача кучайиши кутилмоқда.