Тошкентдаги хусусий клиникада вафот этган 9 ёшли бола ишида икки шифокор қамалди

2025 йил августида «Paeonnis» клиникасида 9 ёшли бола бурун соҳасида ўтказилган ринопластика жарроҳлик амалиёти пайтида вафот этган эди. Суд анестезиолог ва лор-шифокорни касб вазифаларини зарур даражада бажармаганликда айбдор деб топди.

Фото: lenobl.sledcom.ru

Тошкент шаҳридаги «Paeonnis» хусусий клиникасида бурун операцияси вақтида вафот этган 9 ёшли бола иши бўйича суд ҳукми эълон қилинди. Воқеа 2025 йил 25 августида содир бўлган. Боланинг бурнида аденоид аниқланган ва клиника шифокорлари уни жарроҳлик йўли билан олишни тавсия қилган.

Олий суд ахборот хизматининг Kun.uz’га хабар беришича, 12 март куни Жиноят ишлари бўйича Тошкент шаҳар Мирзо Улуғбек туман судида боланинг ўлимига оид жиноят иши кўриб чиқилган.

Суд қарорига кўра, «Paeonnis» хусусий клиникасида ишлаган анестезиолог-реаниматолог ҳамда лор-шифокор Жиноят кодексининг 116-моддаси 3-қисми (касб вазифаларини лозим даражада бажармаслик) билан айбдор деб топилган. Уларга 4 йил озодликдан маҳрум қилиш, 3 йил давомида жарроҳлик амалиётида иштирок этиш ҳуқуқидан маҳрум қилиш жазоси қўлланган.

Суд ҳукмига кўра, жазо манзил колонияларда ўталади. Судланувчиларга нисбатан қўлланган уй қамоғи эҳтиёт чораси бекор қилиниб, улар суд залидан қамоққа олинган.

Аввалроқ Тошкентдаги хусусий клиникалардан бирида 31 ёшли йигит ҳам бурун операциясидан кейин вафот этганди.