Туркиядаги лицейда отишма рўй берди

Ҳужум қилган шахс шу лицейнинг собиқ ўқувчиси бўлиб, у 16 кишини яралаган ва кейин ўз жонига қасд қилган.

Фото: Hurriyet

Туркиянинг Шонлиурфа вилояти Сиверек туманида жойлашган касб-ҳунар ва техника лицейида отишма рўй берди.

Hürriyet газетаси хабарига кўра, ҳужум қилган шахс лицей биносига ов милтиғи кўтариб келган ва атрофга тартибсиз равишда ўт очган. Шонлиурфа вилояти губернатори Ҳасан Шилдак хабар беришича, жами 16 киши яраланган. Шифокорлар икки ўқитувчи ва икки ўқувчининг ҳолати ўрта даражадаги оғирликда эканини қайд этишган.

Губернаторнинг сўзларига кўра, ҳужум қилган шахс полициячилар воқеа жойига етиб келганидан кейин ўз жонига қасд қилган. Ҳужум мотивлари ҳозирча номаълум. Хабар қилишларича, ушбу 19 ёшли шахс лицейнинг собиқ ўқувчиси ҳисобланади.

Гувоҳларнинг сўзларига кўра, у бинога асосий дарвозадан кирган ва узун стволли қуролдан ота бошлаган. «Аввалига у ўнгга ва чапга, кейин мактабга томон ўт очди. Кейин эса ичкарига чопиб кетди. Ичкарида у йўлидан чиққанга қарата ўқ узган», – дея ҳикоя қилади Hürriyet газетаси суҳбатдоши.