Qirg‘izistonda Rossiyaning yana bir harbiy bazasi paydo bo‘lishi mumkin

Qirg‘izistonning Rossiyadagi yangi elchisi Alikbek Jyekshenkulov mamlakat janubida Rossiyaga qarashli ikkinchi harbiy bazaning ehtimoliy ochilishi haqidagi savolga javob berdi. Bu haqda TASS xabar qilmoqda.

Uning so‘zlariga ko‘ra, Kantdagi mavjud aviabaza butun Markaziy Osiyo uchun muhim barqarorlashtiruvchi omil hisoblanadi. Bishkek esa uni kuchaytirish bo‘yicha taklifni qo‘llab-quvvatlayapti. Shu bilan birga, yana bir bazaning ochilish ehtimoli istisno etilmayapti.

«Shuning uchun, menimcha, bu masala ikki mamlakat prezidentlarining mart oyida bo‘lib o‘tadigan uchrashuvida muhokama qilinishi mumkin», - dedi Jyekshenkulov.

Uning ta'kidlashicha, Farg‘ona vodiysining o‘ziga xos xususiyatlarini ham e'tiborga olish kerak, Qirg‘izistonning janubi uning bir qismi sanaladi. Qayd etilishicha, bu yerda ijtimoiy-iqtisodiy va demografik xususiyatga ega qator dolzarb masalalar mavjud.

Eslatib o‘tamiz, avvalroq Rossiya tashqi ishlar vaziri Sergey Lavrov 3-4 fevral kunlari rasmiy tashrif bilan Bishkekda bo‘lishi xabar qilingandi.