Yevroittifoq sharqiy chegaralarga yaqin hududlarni qo‘llab-quvvatlashni kuchaytiradi

Yevropa Ittifoqi Ukrainaga qarshi Rossiya urushi oqibatlarini qoplash maqsadida YeIning sharqiy chegaralariga yaqin hududlarni qo‘llab-quvvatlashni kuchaytiradi. Shu maqsadda EastInvest deb nomlangan investitsion platforma tashkil etiladi, u zarar ko‘rgan hududlardagi korxonalar va mahalliy hokimiyat organlarining moliyalashtirish manbalariga yetib borishini soddalashtiradi, deb ma’lum qildi chәrshanba kuni, 18 fevralda Bryusselda YeIning mintaqaviy rivojlanish bo‘yicha komissari Raffaele Fitto.

Yangi platforma 26 fevraldan ish boshlaydi. Ushbu dastur doirasida ko‘p milliardli kreditlar taqdim etiladi, shuningdek YeIning keyingi budjeti doirasida chegaralar mudofaasi va xavfsizligini mustahkamlash uchun Yevropa mablag‘laridan yordam ko‘rsatiladi.

Jumladan, Finlandiya, Polsha, Slovakiya, Vengriya, Ruminiya, Bolgariya, Estoniya, Latviya va Litvaning chegaradosh hududlarida xavfsizlik va iqtisodiy o‘sish sohalarida qo‘llab-quvvatlash rejalashtirilgan. Bu davlatlarning barchasi Rossiya, Belarus yoki Ukraina bilan chegaradosh yoki Qora dengiz sohilida joylashgan.

Yevropa komissiyasi ta’kidlashicha, bu hududlar Ukrainadagi urush sabab aholining ko‘chib ketishi, iqtisodiy o‘sishning pasayishi va inflatsiyaning kuchayishi kabi muammolardan aziyat chekmoqda. Bundan tashqari, xavfsizlikni mustahkamlash uchun qo‘shimcha investitsiyalar ham zarur.