Samarqandda o‘quvchisini darvoza bosib qolgan maktab mutasaddilariga chora ko‘riladi

Samarqand shahri Panjob mahallasi hududida joylashgan 71-umumiy o‘rta ta'lim maktabining 6-sinf o‘quvchisi, 12 yoshli Jonibek Hamroqulov maktabga kelayotganida ro‘y bergan baxtsiz hodisa oqibatida vafot etgan.

Samarqand shahar xalq ta'limi muassasalari faoliyatini metodik ta'minlash va tashkil etish bo‘limi mutassadilaridan birining Kun.uz’ga ma'lum qilishicha, voqea 4 may kuni birinchi smenada darslar tugagandan so‘ng, kunduzi soat 12:45 atrofida ro‘y bergan.

Ikkinchi smenda o‘qiydigan J.Hamroqulov maktabning orqa tomonidagi devorga o‘rnatilgan va qulflangan maktabning zaxira darvozasidan maktabga oshib o‘tish maqsadida unga osilganida darvoza tayanchlari qo‘zg‘alib, metall gardish uning boshiga kelib urilgan. Shahar xalq ta'limi bo‘limi mutasaddisining ta'kidlashicha, J.Hamroqulov RShTYoIM Samarqand filialiga olib ketilayotganida «tez yordam» mashinasi ichida hayotdan ko‘z yumgan.

Shahar xalq ta'limi bo‘limidagi mutasaddining Kun.uz’ga bildirishicha, surishtiruv natijasida bir o‘quvchining o‘limiga sabab bo‘lgan nosozlikka yo‘l qo‘ygani uchun 71-maktab direktori va xo‘jalik ishlari mudiri o‘z vazifasidan ozod qilinishi mumkin.

71-maktabning orqa qismida joylashgan nosoz darvozasi butunlay olib tashlangan va uning o‘rniga g‘isht terilgan.

Voqea yuzasidan Samarqand shahar prokuraturasi tomonidan tergov surishtiruv ishlari olib borilmoqda.