Toshkentdagi “Xo‘ja Alambardor” jome masjidi imom-xatibi xayriya tadbirida qatnashdi

Joriy yilning 29 mart kuni Toshkent shahar “Xo‘ja Alambardor” jome masjidi imom-xatibi Rahimberdi Rahmonov shahrimizning “Kamolon” mahallasida yashovchi boquvchisini yo‘qotgan, e'tiborga muhtoj oilalar, keksalar xonadonlarini yo‘qlab, ularning xolidan xabar oldi. Imom-xatib keksalar duosini olib, ular doimo mahallaning ardog‘ida ekanliklarini bildirdi. Dinimizda inson sha'ni, qadr-qimmatining azizligi, ayniqsa, keksalar duosi saodat kaliti ekanligi, kundan-kunga obod bo‘lib borayotgan yurtimizda hech kim mehr-muruvvatdan chetda emasligini aytib o‘tdi. 

“Allohga shukurki, mahallamiz qadimdan havasli manzillardan hisoblanib keladi. Bu yerdagi yurtdoshlarimiz huddi bir-birlariga qarindoshdek. Yaxshi kunlarida ham, yoki biror musibat onlarida ham o‘zaro yelkadosh bo‘lib, doim bir-birlarini qo‘llab kelishadi. Qo‘shnilar inoqlik va samimiyatda asl millatimiz birdamligini namoyon etadilar. Imom-domlamiz tashabbuslari, ko‘rsatmalari asosida doimiy ravishda o‘tkaziluvchi bu kabi ezgu ishlar ham so‘zimizga isbot bo‘la oladi”, - dedi “Kamolon” mahallasi raisi Baxtiyor Sultonov.