Kuniga 8 soatdan kam uxlash tanaga qanday ta’sir ko‘rsatadi?

Olimlar kattalar uchun kuniga o‘rtacha 7–9 soat uyquni tavsiya etadi. Ammo ko‘pchilik ish, o‘qish yoki turmush tarzi sabab yetarlicha uxlashga vaqt ajratmaydi. Natijada organizmda asta-sekin jiddiy muammolar yuzaga keladi.

Avvalo, miya faoliyati izdan chiqadi: diqqat susayadi, xotira zaiflashadi, qaror qabul qilish qobiliyati sekinlashadi.

Uyqu yetishmasligi yurak-qon tomir tizimiga ham jiddiy zarar yetkazadi. Qon bosimi oshishi, yurak urish ritmining buzilishi va insult xavfining ortishi shular jumlasidandir. Bundan tashqari, uyqusizlik gormonal muvozanatni ham buzadi. Stress gormoni – kortizol miqdori oshib ketadi, insulin sezgirligi kamayadi, natijada 2-tur diabet xavfi kuchayadi.

Shuningdek, leptin va grelin kabi ishtaha gormonlari muvozanati o‘zgarib, odam ko‘proq ovqatlana boshlaydi, bu esa semirishga olib keladi. Immun tizim ham zaiflashadi: organizm virus va bakteriyalarga qarshi sustlashadi, gripp va shamollash kabi kasalliklar tez-tez takrorlanadi.

Eng e’tiborlisi, uyqu yetishmasligi tashqi ko‘rinishda ham namoyon bo‘ladi: teri rangparlashadi, ajinlar ko‘payadi, odam o‘zini doimiy charchagan va toliqqan his qiladi.

Yetarlicha uyquni o‘ziga ravo ko‘rmagan inson faqat vaqtinchalik charchoqqa emas, butun organizmga sekin-asta zarar yetkazadigan xavfli jarayonga yo‘l ochib bergan bo‘ladi.